Memleketke 3 trln teńgeden asa shyǵyn keltirgen: SQO-da kásipkerler qaıta qamaýǵa alyndy
PETROPAVL. KAZINFORM — Soltústik Qazaqstan oblysynda «Tıolaın» JShS jáne «Obýhov taý-ken baıytý kombınaty» JShS basshylaryna qatysty qylmystyq is sotta qaıta qaralady.
SQO sotynyń málimetinshe, kásiporyndardyń basshylary D. V., D. D.-ǵa jer qoınaýyn óz betinshe paıdalaný, zańsyz kásipkerlik jáne para berýge oqtalý boıynsha aıyp taǵylǵan. Bul qylmystyq iste taǵy eki adam — Q.S., S. T. — para berýge jáne alaıaqtyq jasaýǵa azǵyrý boıynsha jaýap berýde.
Sottalýshylar 2021 jylǵy sáýirden bastap 2024 jyldyń qańtaryna deıin SQO Taıynsha aýdany Obýhovka aýylynyń mańynda ornalasqan «Obýhovskoe» ken ornynda zańsyz paıdaly qazbalardy óndirgen. «Tıolaın» JShS jáne «Obýhov taý-ken baıytý kombınaty» JShS basshylary D. V. jáne D. D. óz betinshe kólemi 1 620 620,16 tonna tıtan-tsırkonıı kenin óndirip, memleketke 3 trln teńgeden astam shyǵyn keltirdi.
Osy kezeńde D. V. jáne D. D. paıdaly qazbalardy óndirýge ruqsat beretin lıtsenzııasyz 23 mlrd teńgeden astam paıda kórgen, olar tıtan-tsırkonıı jáne ılmenıt kontsentratyn satyp, kásipkerlikpen zańsyz aınalysqan.
2023 jyldyń tamyzynan qyrkúıegine deıingi aralyqta K.S. jáne S. T. quqyq qorǵaý organdarynyń laýazymdy tulǵalaryna para beremiz dep D. V.-ny 225 mln teńge somasynda aqsha berýge kóndirip, onyń 90 mln teńgesin aldap qaltaǵa basqan.
Qylmystyq is buǵan deıin alqa bıler alqasymen qaralyp, olardyń sheshimimen D. V., D. D., K.S., S. T. aqtalyp, sot zalynan shyǵaryldy.
SQO sotynyń qylmystyq ister boıynsha sot alqasynyń qaýlysymen SQO qylmystyq ister jónindegi mamandandyrylǵan aýdanaralyq sotynyń aqtaý úkimi joıyldy. Qylmystyq is sol sotqa qaıta basqa quramda jańadan sot talqylaýyna jiberildi.
Sot isti qaraý kezinde qylmystyq is júrgizý zańyn buzyp, saldarynan bul sot úkiminiń qaýlysyna áser etken.
Máselen, sot suraq paraǵyn tujyrymdaý kezinde taraptardyń básekelestigi men teń quqyqtylyǵy qaǵıdatyn buzdy jáne sot alqabılerdiń suraqtardyń mazmuny boıynsha eskertýlerin eskermegen, qosymsha suraq qoıǵyzbaǵan.
Sot alqabılerge qysym kórsetý týraly mán-jaılardy anyqtaý úshin tıisti sharalar qabyldamaı, olardyń ótinishine tıisti túrde jaýap bermegen.
Buǵan deıin SQO-da eki balanyń astan ýlanyp qaıtys bolýyna kináliler áli jazalanbaǵanyn jazǵan edik.