Memleketke 1,4 mlrd teńge zalal ákelgen qylmystyq toptyń múshesi Moldovadan tabyldy

ASTANA. KAZINFORM — Bas prokýratýra men Qarjy monıtorıngi agenttiginiń qyzmetkerleri Syrtqy ister mınıstrliginiń kómegimen Moldova Respýblıkasynan qylmystyq jaýapkershilikke tartý úshin Qazaqstan azamatyn ekstradıtsııalady.

Kúdikti 2021-2022 jyldar aralyǵynda Almaty qalasynda uıymdasqan qylmystyq toptyń basqa múshelerimen birge júıeli túrde zańsyz ekonomıkalyq jáne qarjylyq alaıaqtyqty júzege asyrǵan.

Onyń róli — qalanyń belgili bir bankterinde shot ashý, búrkeme mámile boıynsha alǵashqy býhgalterlik qujatta taýarlardy satyp alý-satý, jumysty oryndaý, qyzmet kórsetý jónindegi mámilelerdi kórsetý sekildi áreketter.

Qylmystyq top salyq tólemegen. Osynyń saldarynan memleketke 1,4 mlrd teńgege jýyq somada zalal kelgen.

Bul qylmystyq topqa qatysýshylardyń bir bóligi uzaq merzimge sottalǵan, al kúdikti qylmys jasaǵannan keıin jasyrynyp, oǵan halyqaralyq izdeý jarııalanǵan.

Mamyr aıynda ol Moldova Respýblıkasynyń aýmaǵynan ustaldy.

Qazaqstan Bas prokýratýrasynyń suraý salýymen Moldova tarapynan kúdiktini Qazaqstanǵa ekstradıtsııalaý jóninde sheshim qabyldandy.

Qazirgi ýaqytta ol Almaty qalasynyń tergeý ızolıatorynda otyr. 

Oǵan taǵylǵan qylmysty jasaǵany úshin múlki tárkilenip, on jylǵa deıingi merzimge bas bostandyǵynan aıyrý jazasy kózdelgen.