Memleketke 1,2 mlrd.teńge zalal keltirgen «Kazgıdromet» top-menedjerine qatysty tergeý aıaqtaldy
ASTANA. QazAqparat - Qarjy polıtsııasy agenttigi aǵymdaǵy jylǵy 5 sáýirde N. Sultanovqa qatysty qylmystyq istiń tergeýin aıaqtady.
Oǵan Qorshaǵan ortany qorǵaý mınıstrliginiń «Kazgıdromet» sharýashylyq júrgizý quqyǵyndaǵy respýblıkalyq memlekettik kásiporny bas dırektorynyń birinshi orynbasary bola tura, taýarlar men jumystardy satyp alý kezinde qyzmettik ókilettigin teris paıdalaný jolymen memleketke 1,2 mlrd.teńge bıýdjet qarajatyn jónsiz paıdalaný túrindegi zalal keltirdi degen aıyp taǵylýda.
Ol 2012 jylǵy qańtar-aqpan aılarynda «Adal Tem», «Intertech Industry», «Vektor Stroı 2010» jáne «NPO «Tehkýral» fırmalarymen memlekettik saraptamadan ótken jobalyq-smetalyq qujattamasyz 3,2 mlrd.teńgege qural-jabdyqtar satyp alý týraly kórineý zańsyz kelisimsharttarǵa qol qoıǵan dep aıyptalýda.
Ol atalǵan taýarlardyń taýarlyq bırjalar arqyly satyp alýǵa jatpaıtyndyǵyn jáne memlekettik satyp alýdyń basqa nysany arqyly satyp alynatyn bolsa baǵasy edáýir tómendeıtindigin bilgen.
QR Qarjy mınıstrliginiń Qarjylyq baqylaý komıtetiniń qorytyndysy boıynsha «Kazgıdromet» respýblıkalyq memlekettik kásipornynyń joǵaryda atalǵan kompanııalarmen taýarlyq bırjalar arqyly jasalǵan kelisimsharttary zańsyz.
Búgingi kúni aıyptalýshy men onyń qorǵaýshysyn qylmystyq is materıaldarymen tanystyrý protsedýrasy júrgizilýde, dep habarlady Qarjy polıtsııasynyń baspasóz qyzmetinen.
