Memleketimiz jańa dáýirge qadam basty – Prezıdent

ASTANA. QazAqparat – Memleketimiz jańa dáýirge qadam basty. Bul týraly elordadaǵy «Táýelsizdiktiń 25 jyldyǵy» monýmenti janyndaǵy alańda Naýryz meıramyna arnalǵan merekelik is-sharaǵa qatysqan Memleket basshysy Qasym-Jomart Toqaev aıtty, dep habarlaıdy QazAqparat tilshisi.

«Men dál bir jyl buryn tyń bastama kóterdim. Elimizdi túbegeıli jańǵyrtý úshin aýqymdy reformalar usyndym. Halyq bul bastamalardy qoldady. Biz josparymyzdy bir jylda tabysty júzege asyrdyq. Referendým arqyly Konstıtýtsııaǵa mańyzdy ózgerister engizdik. Bılik júıesin qaıta jasaqtaý úshin mańyzdy saıası sharalar iske asyryldy», - dedi Prezıdent.

Memleket basshysy keshe ǵana ótken Májilis pen máslıhattar saılaýy – búkil reformalarymyzdy alǵa bastaıtyn óte mańyzdy qadam ekendigin basa aıtty.

«Bul saılaý – aýqymdy ózgeristerdiń laıyqty jalǵasy. Osylaısha, memleketimiz jańa dáýirge qadam basty. Jalpy, elimizdiń jańa saıası kelbeti qalyptasty. Tarıhı sát Ulystyń uly kúnimen tuspa-tus kelip otyr. Munyń zor sımvoldyq máni bar», - dedi Qasym-Jomart Toqaev.