Memleketimiz úshin adam quqyǵy eń mańyzdy faktor - S.Tursynov
ALMATY. 14 qazan. QazAqparat /Ádilet Musahaev/ - Memleketimiz úshin adam quqyǵy eń mańyzdy faktor. Bul jóninde QR Prezıdenti janyndaǵy Adam quqyqtary jónindegi komıssııanyń tóraǵasy Saǵynbek Tursynov búgin QazUÝ-de «2010 jyly Qazaqstan Respýblıkasyndaǵy adam quqyqtarynyń ahýaly týraly» baıandamalardyń tanystyrylymy kezinde málim etti.
Adam quqyqtarynyń saqtalýy, qorǵalýy ásirese, álemge beıbitshilik brendimen tanylyp otyrǵan qazaq eli úshin úlken syn. Ásirese, 2010 jyly EQYU-ǵa tóraǵalyq etken tusta adam quqyqtarynyń saqtalýy qandaı, ne atqaryldy, qandaı damytar tustary bar degen saýal arnaıy mekemelerdiń biregeı jaýabyna aınaldy. Osyǵan oraı búgin QR Prezıdentiniń janyndaǵy Adam quqyqtary jónindegi komıssııa Eýropalyq qaýipsizdik jáne yntymaqtastyq jónindegi uıymǵa tóraǵalyǵy tusyndaǵy adam quqyqtarynyń saqtalýyn arnaıy zerdelegen baıandamalarymen bólisti.
Atalǵan jıynǵa S.Tursynov, Eýropadaǵy qaýipsizdik jáne yntymaqtastyq uıymynyń Astanadaǵy ortalyǵy basshysynyń orynbasary Jannet Klettser, Ulybrıtanııanyń Almaty qalasyndaǵy Bas konsýly Stıven Hıklıng jáne komıssııa músheleri Tastemir Ábishev, Vıtalıı Voronov, German Nurbaev, Komıssııa sarapshylary Saltanat Baıqoshqarova, QazUÝ rektory Ǵalym Mutanov jáne ǵalymdar men stýdentter qatysty.
Bul baıandamalar Elbasynyń, adam quqyqtary jónindegi halyqaralyq jáne ulttyq sarapshylardyń oń baǵasyn alǵandyǵy osy jıynda aıtyldy. Baıandama Ulybrıtanııanyń Qazaqstandaǵy jáne Qyrǵyzstandaǵy Elshiliginiń, Eýropadaǵy qaýipsizdik jáne yntymaqtastyq uıymynyń Astanadaǵy ortalyǵynyń tehnıkalyq járdemimen qazaq, orys, aǵylshyn tilderinde jeke taralymmen kitap retinde basylyp shyqqan.
Saǵynbek Tursynov halyqaralyq sarapshylar, komıssııa músheleri osy baıandamalar arqyly keńese otyryp, taǵy qandaı usynystar, mindetter qajet ekendigin, sol negizde jumystardy jandandyra túsýdi qolǵa alamyz dep atap ótti. «Ótken jyldardaǵy esepterde adam quqyqtarynyń buzylýy sot úderisterinde jıi kezdesetin bolsa, 2010 jyly bul olqylyqtyń orynyna kelgenin baıqaımyz. Sondaı-aq quqyq qorǵaý organdarynyń áreketteri men áreketsizdikterine shaǵymdaný, ákimderdiń, bıliktiń atqarýshy jáne ókildi tarmaqtary organdary laýazymdy adamdarynyń áreketteri men áreketsizdikterine shaǵymdaný kóp kezdesken», - dep atap ótti ol.
