Memleketimiz ben qoǵamymyz úshin ákimshilik zańnamasyn jetildirý ózekti bolyp otyr
ASTANA. Aqpannyń 25-i. QazAqparat - Búgin Májiliste Ákimshilik quqyq buzýshylyq týraly jáne Ákimshilik is júrgizý kodeksteri jobalarynyń, sondaı-aq elimizdiń keıbir zańnamalyq aktilerine is júrgizý zańnamasy máseleleri boıynsha túzetýler engizýdi qarastyratyn zań jobasynyń tanystyrylymy bolyp ótti.
Osy otyrysta kirispe sóz sóılegen Májilistiń Zańnama jáne sot-quqyqtyq reforma komıtetiniń tóraǵasy Rahmet Muqashev atalǵan qujattardyń mańyzdylyǵyna toqtaldy, dep habarlaıdy QazAqparat.
R.Muqashevtiń aıtýynsha, atalǵan zańnamalyq aktilerdi talqylap, qabyldaýdyń mańyzdylyǵy jóninde 2009 jyly qyrkúıektiń 1-i kúni Parlamenttiń tórtinshi shaqyrylymynyń úshinshi sessııasynyń ashylýynda Memleket basshysy Nursultan Nazarbaev arnaıy toqtalyp ótken bolatyn.
Sonymen qatar elimizdiń 2010-2020 jylǵa deıingi quqyqtyq saıasatyndaǵy Tujyrymdamasynda Qazaqstandaǵy memlekettik basqarý júıesin odan ári damytý ákimshilik reformany quqyqtyq qamtamasyz etý men ákimshilik rásimdeýdi jetildirýmen tyǵyz baılanysty ekeni aıqyndalǵan.
Osyǵan oraı parlamentshilerge júktelip otyrǵan úlken jaýapkershilikti jáne memleketimiz ben qoǵamymyz úshin atalǵan zańnamalyq aktilerdiń ózektiligin aıta ketken jón.
Búgingi tanystyrylymǵa zań jobasyn ázirleýshiler, basqa da memlekettik organdardyń, qoǵamdyq bilestikter men halyqaralyq uıymdardyń ókilderi qatysty. Sondyqtan aıtylǵan pikirler men usynystar tyńdalyp, barlyq túzetýler nazarǵa alynatyn bolady.
Komıtet tóraǵasy zańdardy jetildirý maqsatynda alda aýqymdy jumystar bar ekenin, Parlament qabyrǵasynan sapaly zańdar shyǵýyn qamtamasyz etý mindeti turǵanyn aıta kelip, áriptesterin zań shyǵarý isinde nátıjeli eńbek etýge shaqyrdy.
