Memleketaralyq izdeýde júrgen reseılik qylmysker Nur-Sultannan ustaldy
NUR-SULTAN. QazAqparat - Reseı Federatsııasynyń 58 jastaǵy azamaty «Mıgrant» jedel aldyn alý sharasy barysynda ustaldy, dep habarlaıdy QazAqparat.
Kúdikti 2006 jyly telefon arqyly zorlyq-zombylyq kórsetem dep qorqytyp, Reseı azamatynan úlken mólsherde aqsha talap etken.
Nur-Sultan qalalyq polıtsııa departamenti baspasóz qyzmetiniń málimetinshe, Omby oblysynyń ІІB osy derek boıynsha RF QK 330-babymen qylmystyq is qozǵaǵan.
2019 jyldyń 28 aqpanynan bastap bul azamatqa memleketaralyq izdeý jarııalandy.
Elorda kósheleri men qoǵamdyq oryndarynda tıisti quqyqtyq tártipti qamtamasyz etý, elorda aýmaǵynda zańsyz kóshi-qondy anyqtaý jáne jolyn kesý maqsatynda 1-5 aqpan aralyǵynda «Mıgrant» jedel-aldyn alý sharasy ótkizildi.
Polıtsııa qyzmetkerleri shetel azamattary zańsyz júrýi múmkin oryndardy, qurylys nysandaryn, adam kóp jınalatyn jerlerdi tekserip jatyr.
Shara bastalǵannan beri sheteldik azamattardyń Qazaqstanda júrip-turý erejesin buzýdyń 150-den astam faktisi anyqtaldy, halyqaralyq izdeýde júrgen úsh sheteldik azamat ustaldy.
