Memleketaralyq izdeýde júrgen qylmysker Ýkraınadan elge qaıtaryldy
ASTANA. 28 qyrkúıek. QazAqparat /Marlan Jıembaı/ - Memleketaralyq izdeýde júrgen Soltústik Qazaqstan oblysynyń 30 jastaǵy turǵyny Ýkraınadan Qazaqstanǵa ekstradıtsııalandy.
Bul týraly búgin jýrnalıstermen bolǵan brıfıngte Іshki ister mınıstrligi Memlekettik til jáne aqparat departamentiniń basshysy Nurdildá Oraz málim etti.
Onyń atap ótýinshe, atalǵan azamat 2007 jyldyń qazan aıynda qaraqshylyq jasaǵany úshin bas bostandyǵynan aıyrý ornynda otyryp, keıinnen shartty túrde merziminen buryn bosatylǵan. Biraq shartty túrde merziminen buryn bosatýdyń erejelerin buzǵany úshin oǵan izdeý jarııalanǵan. «Kúdikti Ýkraınanyń Herson qalasynda urlyq jasaǵany úshin ustalyp, sol jaqtyń túrmesinde jazasyn ótegennen keıin Qazaqstannyń talaby boıynsha elimizge qaıtaryldy», - dedi ol.
Sondaı-aq, resmı ókildiń atap ótýinshe, polıtsııa qyzmetkerleri onyń sol jylǵy qarashada Soltústik Qazaqstan oblysy kentteriniń birinde erli-zaıyptylardy óltirip, Qazaqstannan tysqary jerge shyǵyp ketkenin anyqtap otyr.
