Memleketaralyq áýe komıteti apatqa ushyraǵan «Chellendjer-200» ushaǵyna qatysty tergeý barysymen tanystyrdy
ASTANA. 25 jeltoqsan. QazAqparat - Memleketaralyq áýe komıtetinde «Chellendjer-200» ushaǵynyń apatqa ushyraý sebepterin anyqtaýdy kózdegen tergeý barysy jaıly habar berdi.
«Qazirgi ýaqytta biz qorytyndy kezeńdemiz - tergeý barysynda alynǵan zertteý nátıjelerin taldap jatyrmyz», - dep habarlady Memleketaralyq áýe komıteti tóraǵasynyń birinshi orynbasary Aleksandr Fılatov. «Oryn alǵan apat óte aýyr áýe apaty sanatyna jatady, soǵan baılanysty aýqymdy kólemde túrli zertteýler júrgizý qajet boldy, sonyń ishinde, ushýdy modeldeý men keshendi sot-medıtsınalyq saraptama júrgizildi. Onyń nátıjelerin biz qarasha aıynda aldyq».
MAK tóraǵasynyń birinshi orynbasarynyń sózine qaraǵanda, «Bir áýe oqıǵasyn zerttep, qorytyndy esepti daıyndaý AQSh-ta 418 kúndi , Kanadada - 493 kúndi, Avstralııada 478 kúndi alady. Aýyr sanattaǵy apattardy zertteý ýaqyttaryn eseptesek, Chellendjer-200 sııaqty ushaq AQSh-ta 624 kún zertteledi».
MAK aqparaty boıynsha, áýe apatyn zertteýge ushaqty qurastyrǵan memleket retinde Kanadanyń mamandary, ushaqtyń qozǵaltqyshyn qurastyrýshy retinde AQSh ókiletti ókilderi, Kanadanyń kólik mınıstrliginen, AQSh-tyń federaldy avıatsııalyq ákimshiligi, Bombardier Inc jáne General Electric fırmalarynan keńesshiler, Memleketaralyq áýe komıtetiniń úzdik mamandary tartylǵan.
Aleksandr Fılatov Qazan qalasynda jaqynda bolǵan áýe apatynyń tergeýi aıaqtalǵany jaıly Qazaqstandyq BAQ arqyly taraǵan aqparatty teriske shyǵardy.
