Memleket jumys isteýge qabiletti adamdy baǵyp-qaqpaıdy — Úkimet basshysy
ASTANA. KAZINFORM — Memleketten áleýmettik qoldaýdy túrli obektıvti faktorlarǵa baılanysty jumys isteý jáne ózin-ózi qamtamasyz etý múmkindigi joq azamattar ǵana alady. Bul týraly Senattyń jalpy otyrysynda Premer-mınıstr Oljas Bektenov aıtty.
— Shyǵystardy ońtaılandyrýǵa qatysty aıtar bolsaq, bul jumys únemi, onyń ishinde respýblıkalyq bıýdjetti qalyptastyrý protsesinde de júrgiziledi. Máselen, aldaǵy úsh jylǵa arnalǵan bıýdjetti qalyptastyrý barysynda bazalyq shyǵystar 15-ten 12 paıyzǵa qysqartyldy. Bul óte salmaqty tsıfr. Bizde bıýdjet úshin áleýmettik sala óte úlken salmaq salady. Áleýmettik járdemaqylar, tólemder, áleýmettik qoldaýdyń túrli sharalary eger respýblıkalyq jáne jergilikti bıýdjetterdi alar bolsaq, memlekettik bıýdjettik shamamen 60 paıyzyn quraıdy. Uzyq jyldar boıy respýblıkalyq bıýdjettegi bul shyǵystar 40 paıyzdan astam bolǵan edi. Úsh jyldyq bıýdjetti qalyptastyrý barysynda bul tsıfrdy 38 paıyzǵa deıin tómendete aldyq, — dedi Oljas Bektenov senatorlardyń saýalyna oraı.
Sondaı-aq ol áli de úlken olqylyq bar ekenin, ony joıý jumysy jalǵasatynyn aıtty.
— Munyń bárine birdeı unaı bermeıtini túsinikti. Degenmen, Úkimet mundaı saıasatty jalǵastyrady. Memleketten áleýmettik qoldaýdy túrli obektıvti faktorlarǵa baılanysty jumys isteý jáne ózin-ózi qamtamasyz etý múmkindigi joq azamattar ǵana alatyn bolady. Jumys isteı alatyn adam eńbektenýi tıis. Memleket ony baǵyp-qaqpaýy tıis jáne baǵyp-qaqpaıdy da. Biz bul jumysty odan ary jalǵastyramyz, — dedi Úkimet basshysy.
Aıta keteıik, búgin Senattyń jalpy otyrysynda Premer-mınıstrdiń orynbasary — Ulttyq ekonomıka mınıstri Serik Jumanǵarın elimizdiń 2026-2028 jyldarǵa arnalǵan áleýmettik-ekonomıkalyq damý boljamyn tanystyrdy.