Memleket jetim balalardy baspanamen qamtamasyz etpeıinshe, olardy turyp jatqan jerinen shyǵarýǵa tyıym salatyn zań jobasy óndiriske alyndy
ASTANA. 10 qazan. QazAqparat - Búgin QR Parlamenti Májilisiniń jalpy otyrysynda «Qazaqstan Respýblıkasynyń keıbir zańnamalyq aktilerine jetim balalar men ata-anasynyń qamqorlyǵynsyz qalǵan balalardyń turǵyn úıge quqyqtaryn qamtamasyz etý máseleleri boıynsha ózgerister men tolyqtyrýlar engizý týraly» zań jobasy óndiriske alyndy.
«Qoldanystaǵy zańnamada jetim balalar men ata-ana qamqorlyǵynsyz qalǵan balalarǵa baspana berý jónindegi memlekettiń mindeti qarastyrylǵanyna qaramastan, olardyń baspanaǵa quqyn júzege asyrý is-júzinde qıyndatylǵan. Qazirdiń ózinde baspanasy bekitilip berilgen kóptegen osy sanattaǵylar, ózderi balalar úıinde júrgende-aq odan aırylyp qalyp jatyr. Baspana buzylady, basqa sebeptermen joıylady, endi bireýleri álgi baspanany zańsyz ıelenip kete barady. Sondyqtan da, qoldanystaǵy zańnama normalary osy sanattaǵy balalardyń baspanaǵa qatysty quqyn qorǵaý ózgeristerdi qajet etedi», - dedi depýtat Darıǵa Nazarbaeva.
Onyń aıtýynsha, Májilistiń qaraýyna alynǵan zań jobasy árbir jetim balanyń baspanaǵa quqyn qalpyna keltiredi. Bul rette jetim bala men ata-ana qamqorlyǵynsyz qalǵan balalar, emdeý nemese basqa da uıymdarda tárbıelenip jatqan balalar, onyń ishinde qoǵamnan ýaqytsha oqshaýlaýdy qajet etetin balalar baspanaǵa menshik quqyǵyn nemese baspanany paıdalaný quqyǵyn ár ýaqytta saqtap qalatyn bolady. Eger baspanasy bolmasa ony ıelenýge quqy qarastyrylady. «Zań jobasy boıynsha jetim balalarǵa, ata-ana qamqorlyǵynsyz qalǵan balalarǵa eger basqa turǵyn-jaı berilmese onda olardy turyp jatqan orynnan shyǵaryp tastaýǵa tyıym salynady», - dedi depýtat D. Nazarbaeva.
Májilistiń Áleýmettik-mádenı damý komıteti zań jobasyna 2013 jyldyń 17 sáýirine deıin qorytyndy shyǵaratyn bolady.
