Memleket jerdi qaıta aınalymǵa engize bastady
ASTANA. KAZINFORM – 2022 jyldan bastap búgingi kúnge deıin memleket menshigine 13,7 mln gektar jer qaıtaryldy. Onyń ishinde 6,2 mln gektary qaıta bólindi. 2,1 mln gektar jer eldi mekenderge jaqyn ornalasqandyqtan, aýyl turǵyndarynyń mal jaıýyna ortaq paıdalanýǵa berilse, qalǵan 4,1 mln-y aýyl sharýashylyǵy taýarlaryn óndirýshiler arasynda konkýrs arqyly bólindi. Sonymen qatar jer paıdalanýshylar ózderine tıesili 4 mln gektar jerdi ıgerýge kiristi. Bul týraly Úkimettiń baspasóz qyzmeti habarlady.
Bul týraly 18 qyrkúıekte vıtse-premer – ulttyq ekonomıka mınıstri Serik Jumanǵarınniń tóraǵalyǵymen ótken Jer resýrstaryn utymdy paıdalaný jónindegi respýblıkalyq komıssııa otyrysynda aıtyldy.
Memleket basshysy Qazaqstan halqyna Joldaýynda ákimdikterge qaıtarylǵan barlyq aýyl sharýashylyǵy jerlerin 2026 jyldyń ortasyna deıin aınalymǵa engizýdi jáne olardy bólý tetigin ózgertýdi tapsyrǵan bolatyn. Ony oryndaý úshin Aýyl sharýashylyǵy mınıstrligi paıdalanylmaı jatqan jerlerdi bólý josparyn ázirlep, óńirlerge jibergen bolatyn. Aýyl sharýashylyǵy vıtse-mınıstri Azat Sultanovtyń aıtýynsha, jerdi bólý kezinde birinshi kezekte aýyl turǵyndarynyń jaıylymǵa degen qajettiligi jáne fermerlerdiń múddeleri eskerilýi tıis. Bul jerdi aýyl sharýashylyǵy aınalymyna tartý múmkindigin arttyryp, mal sharýashylyǵyn damytady jáne áleýmettik shıelenisti tómendetedi.
Basty jańalyq – paıdalanylmaı jatqan aýyl sharýashylyǵy jerlerin bólý úderisiniń tsıfrlyq formatqa kóshýi. Budan bylaı sheshimder elektrondy konkýrstar negizinde qabyldanady. Jyl sońyna deıin zańnamaǵa tıisti ózgerister engizilýi qajet.
2025 jylǵy 26 tamyzdan bastap konkýrs ótkizý erejeleri jańartyldy. Іrikteý ınvestıtsııa kóleminiń, tehnıka men maldyń bolýy, bilikti mamandarmen qamtamasyz etilýi sııaqty negizgi ólshemsharttar boıynsha júrgiziledi.
Jerlerdi tsıfrlandyrý – mańyzdy qadam. 2024 jyly barlyq aýyl sharýashylyǵy jerlerin (shóldi aýmaqtardan basqa) tsıfrlandyrý aıaqtaldy. Búginde 197,9 mln gektar jerdiń kartasy ashyq formatta qoljetimdi, bul el aýmaǵynyń 72,6%-yn quraıdy. Jumystar tolyǵymen 2025 jyldyń sońyna deıin aıaqtalady.
Otyrysta sondaı-aq Jer resýrstaryn basqarý komıtetiniń aýmaqtyq bólimsheleriniń jyl basynan bergi qyzmeti týraly aqparat berildi. Barlyǵy 2,1 mln gektar jerge 1381 jospardan tys tekserý júrgizilgen. Nátıjesinde 1,5 mln gektardy qamtıtyn 1013 zań buzýshylyqty joıý týraly nusqama berildi.
Qazirgi tańda buryn berilgen nusqamalar boıynsha 350,1 myń gektar jer ıgerile bastady. Al 52,6 myń gektar boıynsha májbúrli túrde qaıtaryp alý úshin sot isteri júrip jatyr. Jalpy qaıtarylýy tıis 2 mln gektardyń 1,55 mln gektary memleketke qaıtaryldy.
– Aýyl sharýashylyǵy jerlerin ádil bólý – halyq úshin eń ózekti máselelerdiń biri, jer komıssııalarynyń aralasýyn boldyrmaı, úderisti tolyqtaı elektrondy ári ashyq etý qajet, - dedi Serik Jumanǵarın.
Ol sondaı-aq jaıylymdardyń tozýymen kúresýdiń mańyzdylyǵyn, mal sharýashylyǵyn damytý jáne asyl tuqymdy mal basyn jańartý úshin aýyldyq okrýgterdiń mańyndaǵy jaıylymdardy qalpyna keltirý qajettigin, bul ýaqytty talap etetinin, sondyqtan qaıta egý jumystaryn qazirden bastaý kerektigin atap ótti.
Aıta keteıik, ShQO-da jer qoınaýyn zańsyz paıdalaný isi áshkerelendi.
Májilis depýtaty Baqytjan Bazarbek «bank qupııasy» uǵymynyń saldarynan 10 mln gektar jerdiń memleketke qaıtarylmaı jatqanyn málim etti.
Jambyl oblysynda sý qorynyń 50 gektar jeri memleket menshigine qaıtaryldy.