Memleket jáne qoǵam qaıratkeri Shárip Omarov turǵan úıge eskertkish taqta ornatyldy

Shárip Omarov jastaıynan memlekettik qyzmetke aralasyp, memleket pen qoǵamnyń damýyna aıtýly úles qosqan tulǵa. Túrli jyldary Qazaqstan jastar isi memlekettik komıteti tóraǵasynyń orynbasary, «Qazaqstan» TRK dırektorynyń orynbasary, Almaty qalasy ákiminiń orynbasary, QR Parlamenti Májilisiniń demýtaty qyzmetterin atqarǵan. Parlamenttegi halyqaralyq qatynas, qorǵanys jáne qaýipsizdik komıtetiniń tóraǵasy retinde Baıqońyrdy Reseıge berý kezinde eki el arasynda birlesken ákimshilik qurý, qazaqstandyq ǵalymdardy reseılik ǵarysh ortalyqtarynda jumys isteýge jiberý, «QazSAT» otandyq spýtnıgin jasaý týraly jumystardyń basy-qasynda júrdi.

2004-2007 jyldary Chehııa men Slovakııa respýblıkalarynda Tótenshe jáne Ókiletti elshi retinde eki eldiń ekonomıka, mádenı salalardaǵy qarym- qatynasynyń damýyna úles qosty. Ol sondaı-aq qazaqstandyqtarǵa áıgili «Dos-Muqasan» ansambliniń múshesi retinde de tanymal. Ol sport súıer qaýym úshin de súıikti tulǵa edi. 35 jyl qatarynan «Jeńis» fýtbol klýbynyń prezıdenti, Qazaqstan fýtboly ardagerleri qaýymdastyǵynyń prezıdenti boldy. Fýtboldan eńbegi sińgen jattyqtyrýshy. Ǵylymda da óz orny bar ol, saıası ǵylymynyń kandıdaty boldy.

2007 jyldyń 29 tamyzynda 59 jasqa qaraǵan shaǵynda júrek talmasynan dúnıe salǵan edi. Búgin araǵa 4 jyl salyp baryp, qaıratker turǵan Tólebaev kóshesindegi 126-shy úıge eskertkish taqta ornatyldy. Taqtanyń ashylýyna Sh.Omarovtyń dostary, áriptesteri, týystary qatysyp, estelikter aıtty.

Búgin sondaı-aq Ortalyq memlekettik murajaıda onyń ómiri men qyzmetine arnalǵan kórme ashylady.