Memleket jáne qoǵam qaıratkeri Qarataı Turysov jaıynda jazylǵan «Azamat» estelik kitaby tusaýkeseri bolady
ASTANA. 31 qańtar. QazAqparat - 2011 jyldyń 2 aqpanynda Qazaqstan Respýblıkasy Prezıdenttik mádenıet ortalyǵynyń kontsert zalynda kórnekti memleket jáne qoǵam qaıratkeri Qarataı Turysov jaıynda jazylǵan «Azamat» estelik kitabynyń tusaýkeseri ótedi,
dep habarlaıdy ortalyqtyń baspasóz qyzmeti.
Atalǵan eńbek kórnekti memleket jáne qoǵam qaıratkeri Qarataı Turysovtyń týǵanyna 75 jyl tolýyna oraı shyǵarylǵan. Bul kitapta el úshin erekshe eńbek etken erdiń eren tulǵasy san qyrynan aıshyqty ashylǵan. Sondaı-aq kitapta Qarataı Turysov jaıly elimizge tanymal qaıratkerlerdiń, qalamgerlerdiń taǵylymdy oı-tolǵanystary, álemdik ekonomıkalyq oıdyń kórnekti ókilderiniń bergen baǵalary, júrek tolqytarlyq estelikteri, aǵamyzdyń kózi tiri kezinde merzimdi baspasóz betterinde jarııalanǵan maqalalary men suhbattary jınaqtalǵan. QR Mádenıet jáne aqparat mınıstrligi aqparat jáne muraǵat komıtetiniń baǵdarlamasy boıynsha shyǵarylǵan kitap úsh bólimnen turady: tulǵa, taǵylym, tilek. Kitapty qurastyrǵan elimizge tanymal qalamger Saýytbek Abdrahmanov. Taralymy - 2000 dana.
Іs-shara barysynda qonaqtar nazaryna Qarataı Turysovtyń qaıratkerlik tulǵasy jaıly 10 mınýttyq qysqasha fılm kórsetiledi. Sondaı-aq sharaǵa Turysovtyń zaıyby Áskergúl Jambaıbekqyzy Turysova, Qazaqstan Halyq jazýshysy, QR Memlekettik syılyǵynyń laýreaty, aqyn - Farıza Onǵarsynova jáne taǵy basqa kisiler qatysyp, estelikter aıtady.
Qarataı Turysov 1934 jyly aqpannyń 2-sinde Jambyl oblysy, Jambyl aýdany, Jasórken aýylynda týǵan. Máskeý geologııalyq barlaý ınstıtýtyn bitirgen. Óz mamandyǵy boıynsha eńbek etken ol birqatar partııalyq jaýapty qyzmetterdi atqarǵan. Qarajal qalalyq, Torǵaı oblystyq partııa komıtetteriniń hatshysy boldy. Keıin birneshe laýazymdy qyzmetterde boldy. 1984-1986 jyldary Qazaqstan Kompartııasy Ortalyq Komıtetiniń hatshysy, 1986-1991 jyldar aralyǵynda Búkilodaqtyq Kásipodaqtary Ortalyq Komıtetiniń hatshysy, 1991 jyly Qazaq KSR Mınıstrler keńesi tóraǵasynyń orynbasary, QR Týrızm, dene shynyqtyrý jáne sport mınıstri, QR Ortalyq saılaý komıssııasynyń tóraǵasy qyzmetterin abyroımen atqardy. KSRO Joǵarǵy Keńesine eki dúrkin depýtat bolyp saılanǵan. Ómiriniń sońǵy jyldarynda Qazaqstan Respýblıkasy Parlamenti Májilisiniń Qarjy jáne bıýdjet komıtetiniń tóraǵasy bolǵan Qarataı Turysov zań shyǵarý isinde de óz qoltańbasyn qaldyrdy. Elge sińirgen eseli eńbegi úshin onnan astam medaldarmen, eki márte «Eńbek Qyzyl Tý» ordenimen jáne «Barys» ordenimen marapattalǵan.
Іs-sharaǵa QR Prezıdenti Ákimshiliginiń ókilderi, Depýtattyq korpýs, QR Joǵarǵy sot ókilderi, Dıplomatııalyq korpýs pen konsýldyq mekemeler, Mınıstrlik ókilderi, Astana qalasy ákimdigi men Bilim basqarmasy, QR Jazýshylar Odaǵy, QR Jýrnalıster Odaǵy, Mádenıet jáne qoǵam qaıratkerleri, «Nur Otan» HDP músheleri, BAQ ókilderi shaqyrylyp otyr.
