Memleket jáne qoǵam qaıratkeri Bátıma Saqaýova dúnıeden ozdy
TALDYQORǴAN. QazAqparat - Almaty oblysynyń qurmetti azamaty, derbes zeınetker Bátıma Saqaýova 92 kelgen shaǵynda dúnıeden ozdy, dep habarlaıdy QazAqparat tilshisi.
Memleket jáne qoǵam qaıratkeri óńirdiń órkendeýine, oblystyń damýyna er azamattarmen ıyq tirestirip úles qosqan el anasy. Taldyqorǵan oblysyn qurýda bilek túre eńbek etip Jetisý óńiriniń ıdeologııasynyń myǵym bolýyna, áleýmettik damýyna bar bilimi men kúsh-jigerin jumsaǵan jan.
Ótken ǵasyrdyń 90-shy jyldarynda Taldyqorǵannyń turalap qalǵan shaǵynda eldiń sabyr saqtap, birliginen ajyramaýyna, qıyndyqty qaıyspaı kóterip shyǵýyna jiger bergen aqylman anasy da, danasy da edi.
1968 jyly Taldyqorǵan oblystyq atqarý komıteti tóraǵasynyń orynbasary laýazymynda júrgende búgingi qaladaǵy áleýmettik mańyzy zor ǵımarattardyń boı kóterýine ózindik qoltańbasyn qaldyrǵan.
Marqummen qoshtasý rásimi 12 aqpan kúni saǵat 9.00-de Taldyqorǵan qalasy, Gaıdar kóshesi 28 úıde ótedi.
