Memleket volonterlerdi qoldaý arqyly olardyń belsendiligin durys jolǵa baǵyttaıdy - sarapshy

ASTANA. QazAqparat - Memleket volonterlerdi qoldaý arqyly olardyń belsendiligin durys jolǵa baǵyttaıdy. Bul týraly QR Tuńǵysh Prezıdenti qory janyndaǵy Álemdik ekonomıka jáne saıasat ınstıtýtynyń sarapshysy Serik Beısembaev aıtty, dep habarlaıdy QazAqparat tilshisi.

«Elimizde «Jasyl el», Dıplommen aýylǵa», jastar tájirıbesi syndy birneshe baǵdaralma bar. Buǵan qosa, jastardyń jumys isteýine qol ushyn beretin Jastar resýrstyq ortalyǵy jumys istep tur. Alaıda, bizdiń zertteýlerimiz osyǵan qaramastan jumysqa ornalasý qazaqstandyq jastar úshin №1 problema bolyp otyrǵandyǵyn kórsetti. Osy rette Prezıdent jarııa etken búgingi bastamalar atalǵan problemaǵa memlekettik organdardyń nazaryn aýdartýǵa, sondaı-aq qoldanystaǵy baǵdarlamalardyń tıimdiligin arttyrýǵa baǵyttalyp otyr», - dedi sarapshy.

Onyń atap ótýinshe, memleket kelesi jyldan bastap bilim qoljetimdiligin arttyrýdy josparlap otyr. Al bul aýyldar men shaǵyn qalalardyń jastary úshin tamasha múmkindik bolmaq. Sebebi orta arnaýly bilim júıesin damytý atalǵan sanattaǵy jastarǵa zor múmkinshilik ashady. Degenmen, bul rette beriletin bilim sapasy da naryq suranysyna saı bolǵany jón.

«Eldiń jastar saıasaty jastardyń áleýmettik belsendiligin arttyrýdaǵy jańa trendterdi qoldaýǵa umtylady. Úlken qalalarda kópshilik baratyn jerlerdi abattandyrý, az qamtylǵan otbasylarǵa kómek kórsetý, ekologııalyq saýattylyqty arttyrý syndy bastamalardyń kóptep týyndap jatqanyn kórip otyrmyz. Jas býynǵa mundaı beıindegi jobalarǵa qatysý qyzyqty. Volonterlerdi materıaldyq yntalandyrý arqyly memleket olardyń belsendiligin durys jolǵa salýmen qatar jastar uıymdary úshin qyzmettiń jańa baǵyttaryn da ashady», - dedi Serik Beısembaev.

Eske salsaq, jastar jylynyń ashylýynda Elbasy volonter stýdentterdiń shákirtaqysyn ósirýdi tapsyrǵan bolatyn.