Memleket úzdik úsh bıznes-ınkýbatorǵa qoldaý kórsetedi
ASTANA. QazAqparat - Tabysty úsh bıznes-ınkýbator memleket tarapynan qoldaýǵa ıe bolady. Bul týraly OKQ-da ótken baspasóz máslıhatynda «Tehnologııalyq damý boıynsha ulttyq agenttigi» AQ basqarma tóraǵasy Marat Omarov málim etti, dep habarlaıdy QazAqparat tilshisi.
«Tehnologııalyq damý boıynsha ulttyq agenttik QR Ulttyq ekonomıka mınıstrligimen birge qarjylyq jáne metodologııalyq kómek arqyly tabysty bıznes-ınkýbatorlarǵa qoldaý kórsetedi. Bıznes-ınkýbatorlar júıesin damytý Baǵdarlamasy boıynsha teń qarjylandyrý bıznesti damytý jáne qoldaýdyń «Bıznestiń jol kartasy - 2020» Biryńǵaı baǵdarlamasy aıasynda júzege asyrylady», - deıdi spıker.
Marat Omarovtyń túsindirýinshe, baǵdarlamanyń maqsaty - bıznes-ınkýbatorlardyń quzirettiligin arttyryp, iri tehnologııalyq kompanııalardy ósirip shyǵarýǵa sep bolatyn sapaly startaptardyń ósimine jaǵdaı jasaý bolyp tabylady.
Marat Omarov keltirgen málimetke súıensek, bıznes-ınkýbatorlar baǵdarlamanyń sharttary boıynsha eńbekaqy qory, ákimshilik ǵımarattardy jalǵa alý, kommýnaldyq qyzmetterge, sonymen birge baılanys qyzmetterine (ınternet, telefon, poshta), ındýstrııalyq-ınnovatsııalyq jobalardy tańdap alý jáne ilgeriletýdi qamtamasyz etý úshin tartylǵan úshinshi tulǵaǵa, oqytý-úıretý sharalaryn uıymdastyrýǵa, bıznes-quzyretin arttyrý maqsatynda bıznes-ınkýbatorlar men onyń rezıdentteri úshin taǵylymdamadan ótý jáne soǵan qatysty (jol júrýge jáne komandırovkaǵa ketken) jumsalǵan shyǵyndarynyń 50 paıyzy qarjylandyrylady, alaıda bul soma 35 mıllıon teńgeden aspaýy kerek.
Marat Omarov óz sózinde sonymen birge bıznes-ınkýbatorlarǵa qoıylatyn talaptar týraly aıtyp berdi.
«Olarda 250 sharshy metrden kem bolmaıtyn bıznes-ınkýbatorlardyń rezıdentterin ornalastyrýǵa bolatyn ákimshilik ǵımarat, joǵary bilimi bar kem degende 5 bilikti kadr, memlekettiń qoldaýynsyz kem degende alty aı jumys júrgize alatyn qarjylyq ahýaly, QR JOO-larymen seriktestik qarym-qatynastary bolýy kerek», - dep túsindirdi spıker.
Onyń aıtýyna qaraǵanda, bıznes-ınkýbatorlardy tańdaý arnaıy komıssııanyń konkýrstyq negizinde irikteýimen júrgiziledi. Ol komıssııanyń quramyna osyǵan qatysty memlekettik organdar men uıymdardyń ókilderi, táýelsiz uıymdardyń syrtqy sarapshylary enedi. Komıssııa túlekterdiń sanyn jáne jobanyń sáttiligin esepke ala otyryp, sheshim shyǵarady.
«Sonymen qatar, jańa ári sapaly ónim jasap shyǵarý úshin ındýstrııalyq-ınnovatsııalyq jobalar boıynsha bıznes-ınkýbatorlardyń rezıdentterine baǵdarlama negizinde memlekettik granttardy bólý qarastyrylǵan (ótinish berilgen negizdi shyǵyndar boıynsha 50 mln teńgege deıin)», - dep habarlady spıker.
Marat Omarov bıznes-ınkýbatorlaý aıasynda granttardy bólý de qarastyrylyp otyrǵanyn atap ótti.
«Bıznes-ınkýbatorlaý aıasynda bıznesti damytý úshin memlekettik granttardy bólýdi 2019 jyldan bastaý josparlanyp otyr. Árbir aımaqta granttardyń sany respýblıkalyq bıýdjetke baılanysty bolady. Atalǵan grantqa tek baǵdarlama aıasynda konkýrstyq irikteýden ótken bıznes-ınkýbatorlardyń rezıdentteri ǵana ótinim bere alady», - dedi ol.
