Memleket turǵyn úı kómegin berý erejelerin jańartty: endi bári ashyq jáne onlaın qoljetimdi
ASTANA. KAZINFORM - Turǵyn úı kómegi – bul Qazaqstandaǵy turmysy tómen azamattar men otbasylarǵa arnalǵan memlekettik tólem. Onyń negizgi maqsaty – memlekettik turǵyn úı qorynan alynǵan turǵyn úı, kommýnaldyq qyzmetter jáne turǵyn úıdi jalǵa alý shyǵyndarynyń bir bóligin óteý.
Memleket áleýmettik turǵydan osal azamattardy qoldaıdy jáne tsıfrlandyrý arqyly protsestiń ashyqtyǵyn qamtamasyz etedi.
Ótinish berý protsesi barynsha jeńildetilgen jáne qoljetimdi: portalda elektrondyq ótinim berý múmkindigi kózdelgen egov.kz.
Bul rette ótinish berýshi men onyń otbasy týraly túıindi málimetter (jyljymaıtyn múliktiń bolýy, turaqty tirkeý, kirister, bank shoty) memlekettik organdarǵa suraý salý arqyly tekseriledi. Kirister týraly málimetter aqparattyq júıeler arqyly tekseriledi.
Ótinimdi tirkeý úshin otbasynyń kámeletke tolǵan múshelerinen kelisim alý qajet. «Áleýmettik kómek» AAJ-de belgilengen lımıtterdi eskere otyryp, normatıvtik esep jasalady, bul sheshim qabyldaý protsesin jyldam jáne yńǵaıly etedi.
Ótinimdi tirkeý úshin otbasynyń kámeletke tolǵan múshelerinen kelisim alý qajet. «Áleýmettik kómek» AAJ-da belgilengen lımıtterdi eskere otyryp, normatıvtik esep jasalady, bul sheshim qabyldaý protsesin jyldam jáne yńǵaıly etedi.
2025 jyly turǵyn úı kómegin qalaı alýǵa bolady: kezeń-kezeńimen taldaý
Turǵyn úı kómegi az qamtylǵan azamattarǵa jáne tabysy tómen otbasylarǵa beriledi, al turǵyn úıge, kommýnaldyq qyzmetterge jáne turǵyn úıdi jalǵa alýǵa arnalǵan shyǵystar (eger ol memlekettik turǵyn úı qorynan alynsa) óńirde belgilengen shekti mólsherden asyp ketse, onda bul kómek beriledi.
Turǵyn úı kómegin óziniń jalǵyz turǵyn úıinde turatyn nemese memlekettik turǵyn úı qorynan jalǵa alǵan azamattar ala alady.
Kim az qamtylǵan dep esepteledi?
Bir turǵyn úıde turatyn jáne otbasynyń barlyq tabysyna shaqqandaǵy turǵyn úıge, kommýnaldyq qyzmetterge nemese (memlekettik qordan jalǵa alǵan jaǵdaıda) baspanany jaldaýǵa jumsaıtyn naqty shyǵyndary, máslıhattar belgilegen shekti deńgeıden (ıaǵnı 5%-dan 10%-ǵa deıin) asyp ketetin otbasylar az qamtamasyz etilgen dep esepteledi.
Kómek alýdyń negizgi sharttary: Tirkeý jáne turý: kómek tek turaqty tirkelgen jáne naqty turǵan jeri boıynsha ǵana kórsetiledi.
Jalǵyz turǵyn úı: kómek tek bir turǵyn úı-jaıǵa beriledi. Azamattar ózderiniń jalǵyz turǵyn úıinde turýy nemese ony memlekettik turǵyn úı qorynan jalǵa alýy tıis.
Tabystardy esepke alý: Otbasynyń tabysy ótinish bergen toqsannyń aldyndaǵy toqsan boıynşa esepteledi. Kiristiń barlyq túri esepke alynady: jalaqy, járdemaqy, alıment, bıznesten túsetin kiris, jalǵa alý, baǵaly qaǵazdar, syıǵa tartý jáne t.b. Turǵyn úı kómegin kórsetý qaǵıdalarynda kórsetilgenderdi qospaǵanda (Qazaqstan Respýblıkasy Ónerkásip jáne qurylys mınıstriniń 2023 jylǵy 8 jeltoqsandaǵy № 117 buıryǵy).
Taǵaıyndaý kezeńi: Turǵyn úı kómegi bir toqsanǵa (3 aıǵa) beriledi. Osy merzim aıaqtalǵan soń qaıtadan ótinish berip, tabys pen shyǵyndy rastap otyrý qajet. Memlekettik qyzmetti qaıta alý múmkindigi qarastyrylǵan.
Kommýnaldyq qyzmetter kimge óteledi? Jańa normalar jáne taǵaıyndaý tártibi
Turǵyn úı kómegi az qamtamasyz etilgen azamattarǵa kelesi shyǵyndardyń bir bóligin óteýge arnalǵan:
kommýnaldyq qyzmetter: sý, jaryq, jylý, gaz;
turǵyn úıdi jáne úı mańyndaǵy aýmaqty kútip-ustaý;
kúrdeli jóndeý;
baılanys qyzmetteri (mysaly, telefon úshin abonenttik tólem);
memlekettik turǵyn úı qorynan alynǵan turǵyn úı úshin jaldaý aqysy.
Neni bilý mańyzdy:
kómek tek bir turǵyn úı-jaıǵa ǵana kórsetiledi;
kómek jeke tulǵadan jalǵa alynǵan úıdiń tólemderine qatysty emes;
kómek kommýnaldyq qyzmetterdi normatıvten tys tutynýdy jappaıdy
kómek turǵyn úı alańynyń belgilengen normalarynan asatyn tutynýdy jappaıdy;
tabysty jasyrǵan jaǵdaıda kómek toqtatylyp, qaıtarylýy talap etilýi múmkin.
Endi turǵyn úı kómegi qalaı esepteledi: biryńǵaı lımıtter jáne bir adamǵa 18 sharshy metr
Turǵyn úı kómegi otbasynyń naqty shyǵyndaryn óńirde belgilengen ruqsat etilgen shyǵyn úlesimen salystyrý arqyly esepteledi.
Esepteý formýlasy:
Turǵyn úı kómegi = Otbasynyń naqty shyǵyndary (kommýnaldyq tólemder, turǵyn úı men aýla aýmaǵyn kútip-ustaý, kúrdeli jóndeý, jaldaý aqysy jáne t.b.)
– Ruqsat etilgen shyǵyn deńgeıi. Ruqsat etilgen shyǵyn deńgeıi – bul otbasynyń jıyntyq tabysynan paıyz túrinde esepteletin shek. Eger turǵyn úıge ketken shyǵyndar osy paıyzdan asyp ketse, memleket artyq bóligin óteıdi.
Bul paıyz mólsherin jergilikti maslıhattar belgileıdi.
Ol otbasynyń jıyntyq tabysynan 5%-dan 10%-ǵa deıin ózgerýi múmkin.
Ruqsat etiletin úles mólsherin máslıhattar belgileıtindikten, kómek sharttary men krıterııleri ár aımaqta ár túrli bolýy múmkin. «Áleýmettik kómek» AAJ-de naqty óńirde kommýnaldyq qyzmetterge belgilengen lımıtterdi eskere otyryp, normatıvtik esep jasaý júrgiziledi.
Turǵyn úı kómegi: 15 mınýtta onlaın ótinish berýge bolady
Ótinish berý eki tásilmen júzege asyrylýy múmkin:
1. eGov.kz portaly arqyly (qyzmet «Turǵyn úı kómegin taǵaıyndaý» dep atalady).
2. Turǵylyqty jeri boıynsha Halyqqa qyzmet kórsetý ortalyǵynda (HQKO) jeke ózi.
Eger ótinishti elektrondy túrde berseńiz, elektrondyq tsıfrlyq qoltańba (ETsQ) qajet bolady.
Ótinish berý jáne qarastyrý boıynsha nusqaýlyq:
Birinshi kezeń: Ótinish berý. Іs-qımyl: Azamat turǵyn úı kómegin alýǵa ótinish beredi. Talaptar men tekserýler: elektrondyq nemese jeke berý. Ótinish 6 jumys kúni ishinde qaralady.
Ekinshi kezeń: tekserý. Іs-qımyl: negizgi málimetterdi tekserý úshin memlekettik organdarǵa suraý salý júrgiziledi: jyljymaıtyn múliktiń bolýy, turaqty tirkeý, otbasy quramy, banktik shot jáne memlekettik jalǵa beriletin turǵyn úıdiń bolýy.
Ótinimdi tirkeý úshin mynalar qajet:
1) birneshe jyljymaıtyn múlkiniń bolýy týraly derekterdiń bolmaýy;
2) Otbasyndaǵy kámelet jasyna tolǵan músheleriniń kelisimi.
Úshinshi kezeń: derekterdi engizý. Іs-áreket: usynylǵan túbirtekterge sáıkes ótken toqsandaǵy naqty shyǵyndar engiziledi. Talaptar men tekserýler: Turǵyn úı kómegin kórsetý erejesine sáıkes rastaıtyn qujattardy engizý qajet.
Tórtinshi kezeń: qaraý. Іs-áreket: jergilikti atqarýshy organdar (ákimdikter) ótinishti jáne kirister, jyljymaıtyn múlik, shyǵystar boıynsha naqty barlyq málimetti qabyldaıdy. «Áleýmettik kómek» AAJ-da normatıvtik esep jasalady. Talaptar jáne tekserýler: Ótinish 6 jumys kúni ishinde qaralady.
Besinshi kezeń: sheshim jáne tólem. Іs-áreket: Turǵyn úı kómegin taǵaıyndaý nemese bas tartý týraly sheshim shyǵarylady. Ótinish berýshige habarlama jiberiledi. Tizimder QR QM Qazynashylyq komıtetine qarajatty óńdeý jáne aýdarý úshin jiberiledi.
Turǵyn úı kómegin rásimdeý úshin mynalar qajet:
Jeke kýálik;
Ótinish berer aldyndaǵy toqsanǵa otbasynyń tabysyn rastaıtyn qujattar;
Sol toqsandaǵy kommýnaldyq qyzmetterge (jylý, sý, jaryq, gaz jáne t.b.), turǵyn úıdi kútip-ustaý men kúrdeli jóndeýge tólengen túbirtekter;
Baılanys qyzmetteri úshin (telefon jáne t.b.) túbirtek nemese kelisimshart;
Eger baspana memlekettik qordan jalǵa alynǵan bolsa – jalǵa alý sharty jáne tólem mólsheri kórsetilgen qujat;
Banktik esepshot nómeri (IBAN).