Memleket tsıfrlyq jobalarǵa otandyq IT kompanııalardy tartyp jatyr
ASTANA. KAZINFORM — Otandyq IT-kompanııalar memleketke kásiporyndarda tsıfrlyq jobalardy júzege asyrýǵa qoldaý kórsetedi, dep habarlaıdy QR Ónerkásip jáne qurylys mınıstrliginiń baspasóz qyzmeti.
«QazIndustry» qazaqstandyq ındýstrııa jáne eksport ortalyǵynyń mamandary otandyq jetekshi IT-kompanııalardyń jáne ındýstrııalyq seriktesterdiń ókilderimen birqatar kezdesý ótkizdi. Bul kezdesýlerde birlesken jobalardy iske asyrý jáne otandyq kásiporyndardyń óndiristik úderisterindegi jasandy ıntellekt bazasyna olardyń ozyq sheshimderin engizý máseleleri qaraldy. Ónerkásip salasyn tsıfrlandyrý arqasynda qazaqstandyq óndirýshiler halyqaralyq naryqta neǵurlym básekege qabiletti bolyp otyr.
Іs-sharalarǵa ARCOBO, Tems.AI, SafeSight AI, AIGINEER kompanııalarynyń sarapshylary, sondaı-aq «Tsıfrlyq tehnıka jáne tehnologııalar ınstıtýty» AQ (IDET.kz) ókilderi qatysty.
Kezdesýler barysynda tsıfrlyq jáne robottandyrylǵan sheshimderdi engizýdiń naqty tájirıbeleri, sondaı-aq tabysty jobalardy óristetý múmkindikteri talqylandy.
Mysaly, ARCOBO kompanııasy ónerkásipke arnalǵan robottandyrylǵan júıelerdi ázirlep, olardy qoldanysqa engizýmen aınalysady. Bulardyń qatarynda dánekerleý jáne qaptaý keshenderi, stanoktar men palletteý júıelerine arnalǵan uıashyqtar, sondaı-aq standarttan tys avtomattandyrylǵan múmkindikter bar. Bul júıeler kásiporyndarǵa qol eńbegine táýeldilikti azaıtyp, óndiris úderisin jedeldetýge, ónim sapasyn arttyrýǵa jáne úzilissiz, táýlik boıy jumys isteýge múmkindik beredi.
Sondaı-aq kompanııanyń eń kúrdeli tehnologııalyq ónimi — WAAM tehnologııasy boıynsha metaldan basyp shyǵarýǵa arnalǵan ARCOBO 3D-prınteri tanystyryldy. Bul kópdeńgeıli júıe ónerkásiptik robotty, dánekerleý kózin, avtorlyq baǵdarlamalyq qamtamasyz etýdi, úderisti basqarýdy jáne basyp shyǵarýdy naqty ýaqyt rejıminde tsıfrlyq basqarýdy qatar atqarady, iri metall bólshekterdi óndirýge nemese jabdyqtyń tozǵan elementterin saǵatyna birneshe kılogramǵa deıin qalpyna keltirýge múmkindik beredi, jetkizý merzimin barynsha qysqartyp, óndiris pen jóndeý shyǵyndaryn aıtarlyqtaı tómendetedi.
Tems.AI kompanııasy ónerkásiptik kásiporyndarǵa arnalǵan, operatsııalyq tıimdiliktiń tolyq tsıklin qamtıtyn jasandy ıntellekt platformasyn tanystyrdy. Bul platforma qyzmetkerlerdi oqytýdan jáne úderisterdi standarttaýdan bastap, oryndaý sapasyn baqylaý men eseptilikti qalyptastyrýǵa deıingi barlyq kezeńderdi qamtıdy. Atap aıtqanda, platforma óndiristik úderisterdiń beınejazbalaryn kezeń-kezeńimen tsıfrlyq nusqaýlyqtar men reglamentterge (SOP) aınaldyrady, jasandy ıntellekt assıstenti arqyly korporatıvtik bilim bazasyna qoljetimdilikti qamtamasyz etedi jáne tapsyrmalardyń oryndalýyn naqty ýaqyt rejıminde baqylaýǵa múmkindik beredi. Kompanııa qazirdiń ózinde Allur jáne «KedenTransServıs» sııaqty qazaqstandyq kásiporyndarmen birge jobalardy júzege asyrýda. Sonymen qatar halyqaralyq tájirıbege ıe bolyp, Web Summit nusqasy boıynsha Eýropanyń TOP-10 startaptarynyń qataryna engen.
SafeSight AI kompanııasy ónerkásiptik kásiporyndarǵa arnalǵan beınetaldaý múmkindikterin usyndy. Kórsetilgen júıe qaýipsizdik tehnıkasynyń buzylýyn anyqtap, qyzmetkerlerdiń eńbek ónimdiligin taldap, naqty ýaqyt rejıminde basqarýshylyq eseptilikti qalyptastyra alady.
AIGINEER mamandary tsıfrlyq kómekshilerdi paıdalanyp, óndiristik úderisterdi avtomattandyrý jáne ońtaılandyrýǵa arnalǵan ónerkásiptik JI-agentter platformasyn tanystyrdy. Júıe sheshim qabyldaýdy jedeldetip, protsesterdi baqylaýdyń dáldigin arttyrady jáne resýrstardy tıimdi basqarýǵa kómektesedi.
«Tsıfrlyq tehnıka jáne tehnologııalar ınstıtýty» óz kezeginde ónerkásipte, memlekettik sektorda jáne korporatıvtik ortada qoldanylatyn taldamalyq platformalar, ahýaldyq ortalyqtar jáne ıntellektýaldy basqarý júıelerin qurý boıynsha múmkindikterin tanystyrdy.
— Kezdesýlerdiń qorytyndysy boıynsha taraptar ónerkásipke ozyq tsıfrlyq jáne robottyq sheshimderdi engizýge baǵyttalǵan seriktestikti damytýǵa jáne birlesken bastamalardy júzege asyrýǵa ózara múddeliligin rastady. Qazirgi ýaqytta pılottyq jobalardy iske qosý, tájirıbe almasý jáne kásiporyndarda tsıfrlyq sheshimderdi óristetý, aýqymyn keńeıtý úshin yntymaqtastyq týraly memorandýmǵa qol qoıýǵa daıyndyq júrgizilip jatyr, — delingen mınıstrlik habarlamasynda.
Budan buryn Aqtóbede áli de 18 kásiporyn jumysy toqtap turǵanyn jazǵanbyz.
