Memleket tarıhy ınstıtýtynda general-leıtenant Abaı Tasbolatovpen kezdesý ótkizildi
ASTANA. Qańtardyń 13-i. QazAqparat. Memleket tarıhy ınstıtýty táýelsiz Qazaqstan tarıhynyń ózekti máselelerine baılanysty Respýblıkalyq ulan qolbasshysy, general-leıtenant, tarıh ǵylymdarynyń doktory, professor Abaı Bólekbaıuly Tasbolatovpen kezdesýdi ótkizdi,
dep habarlady atalmysh ınstıtýttan.
Kezdesý barysynda A.Tasbolatov táýelsizdik alǵannan bergi Qazaqstannyń áskerı tarıhyndaǵy sońǵy ózgerister men jetistikterge, jańa kózqarastarǵa nazar aýdardy. Jas patrıottardy tárbıeleýde týǵan eli, ósken jeriniń tarıhyn, ataqty tulǵalaryn, eskertkishterin bilýdiń mańyzy zor ekenine basty nazar aýdaratynyn tilge tıek etti. Eliniń ótken tarıhyn bilý ─ Otanyn súıýge baýlıdy. Áskerı salada patrıottyq tárbıeniń negizgi máni jas ulandarymyzdy elimizge, óz Otanymyzǵa aıanbaı eńbek etýge, elin qorǵaýǵa daǵdylandyrý ekeni sózsiz. Osy turǵydan kelgende Respýblıkalyq ulan baspahanasynan Uly tulǵalar Abaı, Shoqan, Ybyraı týraly málimetter, jer ataýy, onyń tarıhyna arnalǵan qysqasha anyqtamalyq quraldar basylyp shyǵarylyp, nátıjesinde áskerı-tarıhı qaıratkerlerdi, oqıǵalardy, ulttyq namys pen táýelsizdigimiz jolynda janyn aıamaǵan kósemderdi, has batyrlardy, olardyń erligi jaıly ǵylymı eńbekter jazý, ony jas ulandarǵa úlgi retinde usyný týraly aıta kele, sonyń bir kórinisi halyq qaharmany S. Nurmaǵambetov týraly estelikter jınaqtalyp jatqanyn jáne bolashaqta ol týraly kólemdi kitap shyǵarý múmkindikterin eskere ketti.
General-leıtenant A.Tasbolatov Uly Otan soǵysyndaǵy jeńistiń 65-jyldyǵy qarsańynda Qazaqstannyń áskerı tarıh salasyndaǵy materıaldardy zertteý barysynda Memleket tarıhy ınstıtýtymen birigip jumys isteýge, baılanys ornatýǵa nıetti ekenin bildirdi.
Kezdesý sońynda Memleket tarıhy ınstıtýtynyń dırektory B. Aıaǵan general-leıtenant A. Tasbolatovqa Instıtýt ǵalymdarynyń eńbekterin syıǵa tartty.
