Memleket tarıhy ınstıtýty ǵalymdarynyń jańa kitaptarynyń tusaýkeseri ótedi
ASTANA. 3 qańtar. QazAqparat - Erteń Ulttyq akademııalyq kitaphanada Memleket tarıhy ınstıtýty ǵalymdarynyń jańadan jazylǵan kitaptarynyń tusaýkeseri ótkiziledi. Іs-sharaǵa Bilim jáne ǵylym mınıstrligi ókilderi, QR Prezıdenti Ákimshiliginiń ókilderi, qoǵam qaıratkerleri, tarıhshy-ǵalymdar, JOO oqytýshylary, Astana qalasynyń JOO stýdentteri, mektep muǵalimderi, BAQ ókilderi qatysady, dep habarlady QR BǴM Memleket tarıhy ınstıtýtynan.
QR BǴM «Ǵylymı qazyna» atty salalyq baǵdarlamasy aıasynda «Uly dala tulǵalary» atty jańa kitaptar serııasy bastaý aldy. Bul serııanyń maqsaty - Qazaqstan tarıhynyń kórnekti qaıratkerleri týraly bilim men tarıhı faktilerdi kópshilikke taratý.
Memleket tarıhy ınstıtýty qyzmetkerleri bul serııany Qazaqstan Respýblıkasy Prezıdenti N.Á. Nazarbaevtyń ómirbaıanynan bastady. «Nýrsýltan Nazarbaev ı kazahstanskaıa model stroıtelstva gosýdarstva (ıstorıcheskıı aspekt)» kitaby Elbasynyń KSRO-nyń quldyraýy jáne Táýelsiz Qazaqstannyń qalyptasýy sııaqty úlken tarıhı dáýirleri kezindegi qyzmetin zertteýge arnalǵan.
Qazirgi memlekettiliktiń irgetasy kórnekti alash qaıratkerlerimen salynyp ketken bolatyn. «Álimhan Ermekov» ǵylymı basylymy Alash qozǵalysynyń kóshbasshylarynyń biri jáne Alash partııasyna, Alash Orda úkimeti múshesi Álimhan Ábeýuly Ermekovke arnalǵan.
«Jumabek Tashenev» kitabynda qazaq halqynyń kórnekti ókiliniń ómiri men qoǵamdyq-saıası qyzmeti týraly baıandalady.
Memleket tarıhy ınstıtýtynyń ǵylymı ujymy halyqaralyq ǵylymı yntymaqtastyǵy jobalaryn sátti iske asyrýdyń nátıjesi Qazaqstandaǵy Bolgarııa Elshiligimen birlese bolgar tilinde basylyp shyqqan «Nursultan Ábishuly Nazarbaev - táýelsiz memlekettiń negizin qalaýshy» atty kitaby.
Elbasy eńbekterin júıeleý úshin, ol týraly jáne qazirgi Qazaqstan týraly ádebıet «Nursultan Nazarbaev jáne Táýelsiz Qazaqstan: bıblıografııalyq kórsetkish (1991-2012)/ Nýrsýltan Nazarbaev ı Nezavısımyı Kazahstan (1991-2012)» kitabynyń 2-shi tolyqtyrylǵan basylymy daıyndaldy.
Qazaqstan Respýblıkasynyń Prezıdenti - Elbasy N.Á. Nazarbaevtyń halqyna «Qazaqstan-2050» Strategııasy»: qalyptasqan memlekettiń jańa saıası baǵyty» Joldaýynda jańa qazaqstandyq patrıotızmdi jáne ulttyń tarıhı sanasyn qurastyrý mindeti qoıylǵan. Bul mindetterdi iske asyrýǵa ǵalym-tarıhshylardyń jańa zertteýleri yqpal etedi. Onyń biri - qazaq tilindegi úsh tomdyq «Qazaqstannyń jańa tarıhy» atty ǵylymı-kópshilik basylym.
«Qazaqstan Respýblıkasy Memlekettik rámizderiniń qalyptasý tarıhy. Istorııa formırovanııa Gosýdarstvennyh sımvolov Respýblıkı Kazahstan» atty basylymda Qazaqstannyń táýelsizdigi resmı rámizderin jasaý jumystaryndaǵy Memleket basshysynyń róline erekshe kóńil aýdarylǵan. Kitapta Memleket rámizderiniń avtorlary týraly málimetter jáne olardyń alǵashqy nusqalarmen jumystary týraly estelikteri keltirilgen.
Tarıhtyń qaıǵyly betteriniń taǵylymdaryn uǵý qazaqstandyqtardyń tarıhı sanasynyń qalyptasýynda mańyzdy oryn alady. «1932-1933 jyldardaǵy asharshylyq aqıqaty. Pravda o golode 1932-1933 godov» ujymdyq monografııa osy taqyrypqa arnalǵan jáne sońǵy shırek ǵasyrda jaryq kórgen otandyq, keńestik, reseı jáne batys zertteýshileriniń eńbekterin taldaýǵa negizdelgen.
«Qazaqstandaǵy asharshylyq: halyq qasireti jáne tarıh taǵylymy / Golod v Kazahstane: tragedııa naroda ı ýrokı ıstorıı» Halyqaralyq konferentsııasynyń materıaldar jınaǵy joǵaryda kórsetilgen kitaptyń qısyndy qosymshasy jáne jalǵasy dep sanaýǵa bolady.
Barlyq basylymdar jańa ádistemelik kózqarasta jazylǵan, bul Memleket tarıhy ınstıtýty ujymynyń Qazaqstannyń jańa tarıhyn zertteýge qosqan úlesteri bolyp tabylady.
