Memleket tarapynan qutqarýshylarǵa jan-jaqty qoldaý kórsetilýge tıis — Toqaev
ASTANA. KAZINFORM — Qasym-Jomart Toqaev «Aýyl qutqarýshylary» bastamasyn búkil el aýmaǵynda keńinen qoldaný qajet dep sanaıdy. Bul týraly Aqordanyń baspasóz qyzmeti habarlady.
Memleket basshysy óndiris oryndaryndaǵy, kenishterdegi, sondaı-aq shalǵaı eldi mekenderdegi qaýipsizdik máselesine erekshe nazar aýdarylyp jatqanyn tilge tıek etti.
— Qutqarý jumystarynyń tıimdiligin arttyrý úshin óndiristik qaýipsizdik salasyna tsıfrlyq tehnologııalar men ınnovatsııalyq sheshimder engizilip jatyr. Budan bólek, shalǵaı eldi mekenderdiń qaýipsizdigine erekshe kóńil bólinýde. Osy baǵytta «Aýyl qutqarýshylary» bastamasy qolǵa alyndy. Joba aıasynda keıingi eki jylda 300-ge tarta órt sóndirý beketi quryldy. Nátıjesinde 450-ge jýyq órt der kezinde toqtatyldy. Osy ıgi tájirıbeni búkil el aýmaǵynda keńinen qoldaný qajet. Taǵy bir mańyzdy másele. Memleket tarapynan qutqarýshylarǵa jan-jaqty qoldaý kórsetilýge tıis. Azamattyq qorǵanys salasy mamandaryn zaman talabyna saı tehnıkamen, qajetti qorǵanys qural-jabdyqtarymen qamtamasyz etý — asa mańyzdy mindet. Qutqarýshylardyń kásibı daıarlyǵyn únemi jetildirip otyrý kerek. Sonymen birge olardyń meılinshe qaýipsiz jaǵdaıda eńbek etýin qamtamasyz etý qajet. Munyń bári de — óte ózekti mindetter, Úkimet osy mindetterge nazar aýdarýy kerek, — dedi Qasym-Jomart Toqaev.
Prezıdent qazirgi kezde qutqarýshylar jaǵdaıdy saraptaı bilýi, batyl bolýy, jedel sheshim qabyldap, kez kelgen qolaısyz ahýaldan jol tabýy qajet dep sanaıdy.
— Deneni shyńdaýmen birge zamanaýı tehnologııalardyń tilin bilgen jón. Máselen, ushqyshsyz apparattardyń jáne avtomattandyrylǵan júıelerdiń keńinen qoldanyla bastaýy arnaıy bilim men quzyretti talap etedi. Málik Ǵabdýllın atyndaǵy Azamattyq qorǵanys akademııasy tótenshe jaǵdaılar qyzmetkerleriniń jańa býynyn daıarlaýda negizgi ról atqarady. Bul — tutas salanyń ustahanasy sanalatyn elimizdegi birden-bir joǵary oqý orny. Akademııa ýaqyt talabyna saı álemdegi úzdik tájirıbelerdi qoldanyp, kúrdeli qutqarý operatsııalaryn zerdeleýi kerek. Sonymen qatar qazaqstandyq qutqarýshylar mektebiniń ozyq dástúrlerin nyǵaıta otyryp, urpaqtar arasyndaǵy sabaqtastyqty saqtaý qajet. Bizdiń azamattyq qorǵaý organdary tótenshe jaǵdaımen kúreste elimizde de, odan tysqary jerlerde de kásibıligimen kózge túsip júr, — dedi Memleket basshysy.
Budan buryn Memleket basshysy qutqarýshylardy «beıbit kúnniń batyrlary» dep atady.
