Memleket sý tasqyny kezinde japa shekken turǵyndarǵa qandaı kómek kórsetti

ASTANA. KAZINFORM – Elimizde kóktemgi sý tasqyny kezinde mal-múlkinen, úıinen aıyrylyp, kásibine shyǵyn kelgen jandarǵa memleket tarapynan tolyqqandy kómek kórsetildi. Bul týraly QR Prezıdentiniń keńesshisi – Baspasóz hatshysy Berik Ýálı Egemen Qazaqstan gazetinde jazdy.

— Kóktemgi sý tasqyny eldi ábigerge salyp, 10 óńirde jergilikti deńgeıdegi tótenshe jaǵdaı jarııalandy.

Memleket basshysy adamdardy dereý qaýipsiz jerge kóshirý jáne qarǵyn sýdan zardap shekken azamattarǵa qajetti kómek kórsetý jóninde tapsyrma berdi. Eń kóp zardap shekken úsh oblys — Batys Qazaqstan, Soltústik Qazaqstan jáne Qostanaı oblystaryna baryp, halyqtyń muń-muqtajyn tyńdady.

Tasqyn sýdyń saldarynan mal-múlkinen aıyrylǵan jandardyń eshqaısysy eleýsiz qalǵan joq. Memleket mindettemesin tolyq oryndady. Zardap shekkenderdiń bárine materıaldyq, qarjylaı qoldaý kórsetildi, - dep jazdy Berik Ýálı.

Sondaı-aq úıinen aıyrylǵandarǵa, kásibine shyǵyn kelgenderge naqty qansha teńge somasynda kómek berilgeni kórsetilgen. 

— Sý tasqynynan zardap shekken óńirlerde komıssııalar jumys istedi, olar azamattardyń jalǵyz baspanasy bolǵan 19 359 úı men saıajaı qurylystaryn tekserdi. Olardy baspanamen qamtamasyz etý maqsatynda jyljymaıtyn múlik naryǵynan 5 767 turǵyn úı satyp alyndy. 9 156 úıge jóndeý jumystary júrgizilip, júz paıyz aıaqtaldy. Bul maqsattarǵa barlyǵy 54,7 mlrd teńge bólindi. Sondaı-aq qysqa merzimde 64 mlrd teńgege 2 680 jeke turǵyn úı salyndy.
Buǵan qosa 36 455 otbasyna jalpy somasy 13,3 mlrd teńge, ıakı 100 AEK mólsherinde birjolǵy áleýmettik kómek kórsetildi. 21 876 otbasyna 9,9 mlrd teńge kóleminde 150 AEK-ke deıingi ótemaqy tólendi.

Shaǵyn jáne orta bıznes sýbektilerine keltirilgen zalaldy óteý úshin 12,1 mlrd teńge bólindi. Zardap shekken kásipkerlik sýbektilerine tolyq tólem jasaý maqsatynda «Demeý» korporatıvtik qorynan Atyraý, Batys Qazaqstan jáne Soltústik Qazaqstan oblystaryna 2,5 mlrd teńge kóleminde qosymsha qarajat bólý máselesi pysyqtaldy. Atalǵan qarajat esebinen ShOB sýbektileriniń 40 ótinishi boıynsha shyǵyny óteldi. Jalpy, óńirlik komıssııalar 14,6 mlrd teńgege 734 kásipkerdiń ótinimin maquldady, - delingen maqalada. 

Odan bólek, mal shyǵynyn tóleý úshin memleket tarapynan kórsetilgen kómektiń kólemi 2,8 mlrd teńgeden asqany aıtylǵan.

Buǵan deıin jazǵanymyzdaı, búginde tasqyndy boljaý jáne modeldeý boıynsha Tasqyn.gov.kz aqparattyq júıesin ázirleý jumystary aıaqtalýǵa jaqyn.

Aıta keteıik, Berik Ýálı Memleket basshysy Qasym-Jomart Toqaevtyń jyl boıy atqarǵan qyzmetine sholý jasap, qoǵamdyq-saıası ómirdegi, áleýmettik-ekonomıkalyq damýdaǵy irgeli ózgerister men tabystar týraly baıandady.

Prezıdent bıyl jumys saparymen elimizdiń 11 óńirine bardy. Aımaqtardaǵy 60-tan asa óndiristik jáne áleýmettik-mádenı nysandarmen tanysyp, jurtshylyqpen kezdesti.