Memleket SQO joldarynyń qurylysyna 10 mlrd teńge bóldi
PETROPAVL. QazAqparat - Bıyl Soltústik Qazaqstan oblysynda jergilikti mańyzy bar 505 shaqyrym avtojol jóndeledi, dep habarlaıdy QazAqparat tilshisi.
Bul jóninde oblystyq máslıhat depýtattarynyń aldynda óńirdiń birinshi jartyjyldyqtaǵy áleýmettik-ekonomıkalyq damýy jóninde esep bergen oblys ákimi Qumar Aqsaqalov málim etti. Óńir basshysy dál osy maqsatta 14 mıllıard teńge bólingenin jetkizdi. Atalmysh somanyń kólemi jyl saıyn arta beretin bolady.
«Jol bolsa, ekonomıka da, bıznes te damıdy. Bıyl respýblıkalyq bıýdjetten 10 mıllıard teńge bólindi. Kelesi jyly qarjylandyrý birden 40 paıyzǵa artady. Bul - tek jergilikti joldarǵa bólinetin qarajat. Osylaısha, 2021 jylǵa qaraı joldardyń 73% jaqsartamyz», - dedi oblys ákimi.
Atap ótilgendeı, aǵymdaǵy jyly Omsk jáne Túmenge aparatyn joldarda jóndeý jumystary aıaqtalady. Jyldyń sońyna deıin Qorǵanǵa júretin joldyń josparlanǵan 60 shaqyrymynyń 30-y jóndeledi. Qalǵany kelesi jylǵa qalady.
Depýtattar jol qurylysynyń sapasyn qatań baqylaýǵa alý kerektigin alǵa tartty. Keıbir joldar bir jylǵa shydamaı buzylyp jatady. Osy rette «Mámbetov jáne K» Senim seriktestiginiń bas dırektory Erkebulan Mámbetov jóndeýden ótken soń bir jyldan keıin túgi qalmaǵan Stanovoe-Razdolnoe tasjolyn tilge tıek etti.
