Memleket shyn muqtaj adamdarǵa ǵana tikeleı kómek kórsetedi – Úkimet basshysy
ASTANA. KAZINFORM – Memleket shyn muqtaj adamdarǵa ǵana tikeleı kómek kórsetedi. Bul týraly Úkimet otyrysynda Premer-mınıstr Oljas Bektenov aıtty.
- Memleket basshysy «Qazaqstan jańǵyrýdyń jańa kezeńine qadam basty» atty baǵdarlamalyq suhbatynda elimizdiń áleýmettik-ekonomıkalyq damýynyń negizgi baǵyttary men basqa da ózekti máselelerdi aıqyndap berdi. Prezıdent bizdiń aldymyzǵa qazirgi ekonomıkalyq damý nátıjelerin saqtap qana qoımaı, sonymen qatar uzaqmerzimdi nátıjege basa mán bere otyryp, damý qarqynyn arttyrý mindetin qoıdy. Bul barlyq salany, onyń ishinde energetıka, turǵyn úı-kommýnaldyq sharýashylyǵy, kólik ınfraqurylymy, ınvestıtsııalardy tartý, agroónerkásip kesheni men týrızmdi damytýǵa qatysty mańyzdy baǵyttardy qamtıdy. Memleket basshysy atap ótkendeı, fıskaldyq saıasatty qaıta qurý baqylaý jasaýǵa emes, seriktestik ornatýǵa basa mán bere otyryp júrgizilýi tıis. Sol arqyly oryn alǵan teńsizdikterdi teńdestirýimiz qajet, - dedi Úkimet basshysy.
Sonymen qatar Premer-mınıstr energetıka jáne kommýnaldyq sektordaǵy jumys tásilin ýaqytyly jáne sapaly iske asyrý qajettigine basa nazar aýdarylǵanyn aıtty.
- Ádiletti tarıfter ony júzege asyrýǵa baǵyttalǵan naqty qadam sanalady. Memleket óz kezeginde shyn muqtaj adamdarǵa ǵana tikeleı kómek kórsetedi. Ulttyq ekonomıka mınıstrligi múddeli memlekettik organdarmen birge turǵyn úı-kommýnaldyq sharýashylyǵyn jańǵyrtý jónindegi ulttyq jobany naqty iske asyrýǵa kirisýi kerek. Kólik-logıstıkalyq toraptardy salý, teńiz porttaryn, áýejaılar men temirjol vokzaldaryn jańǵyrtý boıynsha mindetter sheshimin tabýda. Jaýapty memlekettik organdar men uıymdar aıqyndaldy. Kólik mınıstrligi, ákimdikter men kompanııalar bekitilgen is-sharalardy ýaqytyly júzege asyrýdy qamtamasyz etsin, - dedi Oljas Bektenov.
Aıta keteıik, keshe «Turkistan» gazetinde Memleket basshysy Qasym-Jomart Toqaevtyń atalǵan basylymnyń bas redaktory, belgili aqyn, pýblıtsıst Baýyrjan Babajanulyna bergen keń kólemdi suhbaty jarııalandy.