Memleket shyǵyndy túgel óteıdi – Prezıdent sý tasqynynan kelgen zardap jaıynda
ASTANA. KAZINFORM – Birqatar aımaq ınfraqurylymdy jáne búlingen úılerdi qalpyna keltirýge kiristi. Bul týraly Memleket basshysy Qasym-Jomart Toqaev «Birlik. Jasampazdyq. Órleý» taqyrybymen ótip jatqan Qazaqstan halqy Assambleıasynyń kezekti HHHІІІ sessııasynda aıtty.
«Kezinde bir ǵana bógenniń buzylýy úlken qaıǵyly oqıǵaǵa ákep soqtyrǵanyn bilesizder. Men jaǵdaıdy baqylaýda ustaý úshin birqatar aımaqta boldym. Turǵyndarmen arnaıy kezdestim. Ortalyq jáne jergilikti memlekettik organdar apat saldaryn joıýǵa bar kúshin jumsap jatyr. Jaǵdaıdyń odan ári ýshyǵyp ketpeýi – basty nazarda. Qutqarýshylar kúndiz-túni jumys istep júr. Ulttyq ulan, Іshki ister mınıstrligi, Qarýly Kúshter, Ulttyq qaýipsizdik komıteti, Memlekettik kúzet qyzmetiniń jeke quramy da belsene atsalysyp jatyr», - dedi Prezıdent.
Memleket basshysy óziniń tapsyrmasymen memlekettik materıaldyq rezervti paıdalanýǵa ruqsat berilgenin atap ótti. Respýblıkalyq jáne oblystyq jedel shtabtar jumys istep jatqanyn, qoǵam belsendileri jáne volonterler gýmanıtarlyq kómek jınaýdy qolǵa alǵanyn atap ótti.
«Halqymyzdyń yntymaǵy men joǵary azamattyq jaýapkershiligi osy kezde aıqyn kórindi. Birqatar aımaqtar ınfraqurylymdy jáne búlingen úılerdi qalpyna keltirýge kirisip ketti. Bul sharýaǵa iri bıznes ókilderi qosyldy. Qoǵam belsendileri de zor úles qosýda. Elimizdegi kompanııalar, jeke kásipkerler túrli kómek qorlaryna qomaqty qarjy aýdardy. Qarajat kún saıyn túsip jatyr, kómek qory ulǵaıady dep senemin. Kásipkerlerge zor alǵys aıtamyn. Bolashaqta da halqymyzdyń ıgiligi úshin birge jumys isteımiz dep senemin», - dedi Qasym-Jomart Toqaev.
Prezıdent jınalǵan qarajat eldi mekenderdi qalpyna keltirýge jumsalatyndyǵyn aıtty.
«Sondaı-aq apattyń kesirinen qıyn jaǵdaıǵa tap bolǵan azamattarǵa kómek retinde beriledi. Eshkim eleýsiz qalmaıdy. Memleket shyǵyndy túgel óteıdi. Tasqynnyń zardabyn joıý úshin bıýdjet shyǵystary qysqartylatyn boldy. Memleket qarjysyn qatań únemdeý rejımi engiziledi. Árıne, mańdaı termen tirnektep tapqan dúnıe-múlikti bir sátte joǵaltý ońaı emes. Men muny túsinemin. Zardap shekken azamattarǵa taǵy da aıtamyn: búkil halyq – sizdermen birge. Kóp uzamaı barshańyz qalypty ómirge qaıta oralasyzdar. Ol úshin memleket bárin jasaıdy», - dedi Memleket basshysy.
