Memleket shetelge asyraýǵa berilgen balalardyń taǵdyryna alańdaýǵa mindetti
ASTANA. 18 qyrkúıek. QazAqparat - Memleket shetelge asyraýǵa berilgen balalardyń taǵdyryna alańdaýǵa mindetti. Búgin Parlament Májilisiniń jalpy otyrysynda Bilim jáne ǵylym mınıstrliginiń atyna saýal joldaǵan depýtat Jambyl Ahmetbekov osylaı málim etti.
Depýtattar shetelge berilgen balalardyń taǵdyry týraly tolyq aqparat berýdi surap otyr.
«Búkil qoǵamdy dúr silkindirgen jaǵymsyz habar taralǵaly, áleýmettik jelilerde jetim balalardy satý jáne aıyrbastaý týraly jarnama berilip, taratylǵan habarlandyrýlar áshkere boldy. Bul saýdaǵa túsken balalardyń ishinde Qazaqstannan asyrap alynǵan bizdiń azamattarymyz da bar. ıAǵnı, taǵdyry aýyr osy beıbaq balalarymyzdy keıbir sheteldik asyrap alýshy ata-analary biraz ýaqyttan keıin saýdaǵa shyǵaryp, satyp jiberetindigi belgili bolyp otyr», - deıdi depýtat Jambyl Ahmetbekov. Onyń sózine qaraǵanda, atalmysh saıttar balalardy satýmen qosa, olardy almastyrý, aýystyrýmen de aınalysqan.
«Bul sumdyq qylmysty qazir estýimizshe, amerıkalyq quqyqqorǵaý organdary tekserýde eken. Jaýapkerler jaýapqa tartylar, zańsyz jarnamashy saıttar jabylar. Biraq bul fakti bizdiń beıbaq balalarymyzdyń taǵdyrynan, olardyń qazirgi ahýalynyń jaǵdaıynan habardar etedi», - deıdi depýtat. J. Ahmetbekovtiń aıtýynsha, qazaqstandyq sábıler shetel asqannan soń el bıliginde jetkinshekterimizdiń taǵdyryna aralasý tetikteri az. Sondyqtan da, mundaı faktiler shetelge asyraýǵa berilgen bóbekterimizdiń jańa otbasynda barlyǵy birdeı baqytty bola bermeıtinin kórsetip otyr.
«Sondyqtan Bilim jáne ǵylym mınıstrligi shetel asqan qazaqstandyq balalarǵa qatysty málimetterdi túgendep, olardyń árqaısysynyń taǵdyryn baqylaýǵa alýǵa mindetti», - deıdi depýtat J. Ahmetbekov.
