Memleket shalǵyn kóbelekpen kúreske jumsalǵan shyǵynnyń 50 paıyzyn óteıdi - QR AShM
Mınıstrlik tarapynan osy zııandy organızmniń naqty taralý ortasyn anyqtaý úshin qajetti fıtosanıtarııalyq tekserýler júrgizildi, dep habarlaıdy QazAqparat QR Aýyl sharýashylyǵy mınıstrliginiń baspasóz qyzmetine silteme jasap.
Búgingi tańda 306,59 myń ga jer zertteldi, jalpy taralý aýdany 16,979 myń ga quraıdy, onyń ishinde Aqtóbe oblysynda taralý aýdany 2,892 myń ga quraıdy. Zııankestiń memlekettik qordaǵy jerlerdiń aram shópterinde, sondaı-aq dándi jáne maıly daqyldar egistikteriniń boıynda taralýy baıqalady.
Aýyl sharýashylyǵy mınıstriniń mindetin atqarýshy E. Qarashókeevtiń tapsyrmasy boıynsha Agroónerkásip keshenindegi memlekettik ınspektsııa komıtetiniń tóraǵasy A. Mars Aqtóbe oblysyna shalǵyn kóbelegine qarsy kúres jáne qorǵaý sharalaryn júrgizý boıynsha, jumystardy uıymdastyrý jáne qajetti basqarýshylyq sheshimder qabyldaý úshin is-saparǵa jiberildi.
Aıta ketý kerek, AÓK damytýdyń 2017-2021 jyldarǵa arnalǵan memlekettik baǵdarlamasy aıasynda, aýyl sharýashylyǵy taýaryn óndirýshiler men bıznes ókilderiniń bastamalaryna sáıkes, 2020 jyldan bastap shalǵyn kóbelegine qarsy qorǵaý sharalaryn júrgizý jónindegi jaýapkershilik pestıtsıdter qunynyń shyǵyndaryn 50% - ǵa deıin óteý úshin sýbsıdııalar bere otyryp, jergilikti atqarýshy organdardyń quzyretinen, aýyl sharýashylyǵy taýaryn óndirýshilerdiń quziretine berilgen.
Bıyl pestıtsıdterdi sýbsıdııalaýǵa jalpy 32,3 mlrd.teńge, onyń ishinde Aqtóbe oblysyna 545,8 mln. teńge bólingen.
Tehnıkalyq qaıta jaraqtandyrý boıynsha ınvestıtsııalyq sýbsıdııalar berý aıasynda sharýa jáne fermerlik qojalyqtarǵa ósimdikterdi qorǵaý quraldaryn engizý boıynsha búrikkishterdi arzandatý úshin ózdiginen júretin búrký tehnıkasy qunynyń 50% - yna deıin sýbsıdııalaý kózdelgen, sondaı-aq traktorlardyń quny arzandatylatyn bolady. Otandyq óndiris traktorlary boıynsha qunynyń 30% - yna deıin, ımporttyq óndiris úshin 25% - yna deıin sýbsıdııalaý kózdelgen.
«Qazirgi ýaqytta Aqtóbe oblysynyń ákimdigi 2,2 myń ga alańda hımııalyq óńdeý júrgizýge qarjy bóldi. Qorǵaý is – sharalaryn júrgizý tıimdiligi joǵary búrikkish tehnıka-gaz generatorlaryn paıdalaný arqyly júzege asyrylady»,-delingen habarlamada.