Memleket «Rahat» kámpıtteriniń eksportyn qoldaýǵa 3 mlrd teńgeniń revolverlik nesıesin bóledi

ASTANA. KAZINFORM — «Báıterek» ulttyq basqarý holdınginiń enshiles uıymy sanalatyn Qazaqstannyń Damý Banki «LOTTE Rahat» AQ kompanııasyna kondıterlik ónimderdiń eksportyn qoldaýǵa arnalǵan nesıe bóledi. 

Nesıe revolverlik tásil arqyly rásimdelip otyr. Nesıeniń shekti somasy — 3 mlrd teńge. Kompanııa bul somadan qajetine qaraı nesıe alyp, ony qaıtarǵan soń lımıt sheginen aspaıtyn mólsherde qaıta nesıe rásimdeı alady.

Bul qarjyny «LOTTE Rahat» kompanııasy shokolad, bálish, kámpıt jáne basqa da kondıterlik ónimderin óndirip, eksporttaý shyǵyndaryn óteýge jumsaý kerek.

Eske salsaq, Premer-mınıstr Oljas Bektenov maýsym aıyndaǵy Parlament palatalarynyń birlesken otyrysynda memleket «Báıterek» ulttyq basqarý holdıngi arqyly bızneske 12,6 paıyzben 8 trln nesıe bólinetinin aıtqan edi.