Prezıdent: Memleket pen qoǵam tutastyǵyn nyǵaıtý – aldyńǵy qatarly mindettiń biri
ASTANA. KAZINFORM – Ashyq dıalog júrgizý, azamattardyń muń-muqtajyn eskerip, aryz-shaǵymyna der kezinde jaýap berý eldegi túbegeıli ózgeristerdiń ózegi sanalady. Bul týraly elordadaǵy «Ákimshilik ádilet jáne onyń quqyq ústemdigin qamtamasyz etýdegi róli» atty halyqaralyq forýmda Memleket basshysy Qasym-Jomart Toqaev málim etti.
- Jańa ǵana forým taqyryby boıynsha ózekti oılar men qundy pikirler aıtyldy. Aldaǵy ýaqytta Úkimet bul jumysty mindetti túrde nazarda ustaıdy. Shyn máninde, búgingi jıynnyń mán-mańyzy aıryqsha. Memleket pen qoǵam tutastyǵyn nyǵaıtý – Qazaqstan úshin aldyńǵy qatardaǵy mindettiń biri. Elimiz turaqty damýy úshin halyq pen bılik arasynda ózara senim jáne kelisim bolýy kerek. Bul – myzǵymas qaǵıda. Biraq mundaı kelisim ózdiginen paıda bolmaıtyny anyq. Qoǵamdyq kelisim, bul - kópqyrly tabandy jumystyń nátıjesi. Sondyqtan men Prezıdent retinde osy óte ózekti máselege basa mán beremin, - dedi Qasym-Jomart Toqaev.
Osy oraıda Memleket basshysy elimiz «Halyq únine qulaq asatyn memleket» tujyrymdamasyn júzege asyryp jatqanyn eske saldy.
- Ashyq dıalog júrgizý, azamattardyń muń-muqtajyn eskerip, aryz-shaǵymyna der kezinde jaýap berý eldegi túbegeıli ózgeristerdiń ózegi sanalady. Osy mańyzdy jumysqa bıliktiń ár deńgeıdegi ókilderi, sonyń ishinde mınıstrler, ákimder, depýtattar belsendi túrde qatysýy kerek. Bul – memlekettik qyzmetshilerdiń konstıtýtsııalyq mindeti, - dedi Prezıdent.
Budan buryn habarlanǵandaı, QR Joǵarǵy Sotynyń tóraǵasy Aslambek Merǵalıev ákimshilik sottar jumysynyń alǵashqy jyldary reformanyń tıimdiligin kórsetkenin aıtty.
