«Memleket pen kásipkerliktiń yqpaldastyǵy - óreli maqsat» - respýblıkalyq basylymdarǵa sholý

***

Keshe Aqordada Elbasy Nursultan Nazarbaevtyń tóraǵalyǵymen Qazaqstan Respýblıkasy Prezıdentiniń janyndaǵy Kásipkerler keńesiniń májilisi bolyp ótti. Onyń kún tártibinde Indýstrııalyq-ınnovatsııalyq damýdyń besjyldyq josparyn júzege asyrý aıasynda bıznes ortany odan ári jaqsartý máselesi qaraldy. Osyǵan oraı el gazeti «Egemen Qazaqstanda» «Memleket pen kásipkerliktiń yqpaldastyǵy - óreli maqsat» degen taqyryppen kólemdi maqala jarııalandy. Basylymnyń jazýynsha, osydan bir aı buryn jarııalanǵan Strategııalyq jospar-2020 baǵdarlamasynda kóterilgen negizgi másele elimizdi ındýstrııalyq-ınnovatsııalyq damytý bolǵanyn aıtqan Elbasy keńes májilisine jınalǵan elimizdiń bıznes ókilderine ótken kezeńderden alatyn úsh tálimdi atap kórsetti. «Birinshiden, dedi Elbasy, qaltaǵa qarap, qarapaıym ómir súrý kerek. Sizder ózderińizdi jerdiń kindigindeı sezinip, «Lankrýzerlermen" júrip, on adam kúzetshi ertken jyldardaǵydaı bolmaýy kerek. Tipti mol qarjy bolǵannyń ózinde qarapaıym halyq úshin kózge shyqqan súıeldeı bolýdyń ne qajeti bar? Ekinshi tálim, barlyq nárseden únemdeý qajet, jaqsy ýaqyttarda qıyn kezeńderge daıyndalǵan jón. Úshinshi tálim - nesıelerdi ýaqytynda qaıtarý kerek. Alǵan qaryzdy báribir qaıtarý qajettigi týatyndyǵyn túsingen jón. Mine, úsh tálimniń túıindi tujyrymy osyndaı», dedi Elbasy óz sózinde.

Osy keńesti nysanaǵa alǵan «Aıqyn» gazeti «Barlyq ekpin, bar jumys endi aımaqtarǵa kóshedi» degen taqyryppen maqala basty. Basylymnyń jazýynsha, aldymen baıandama jasaǵan Úkimet basshysy Kárim Másimov memlekettiń qarjysy tek qana belgilengen maqsatta jáne tıimdi paıdalanýy tıis ekendigin basa aıta kelip, «Tek Elbasynyń bıylǵy Joldaýynan týyndaıtyn mindetterdiń iske asýyna qyzmet etetin, tıimdi kásiporyndardy ǵana qoldaımyz!», dep shart túıgen.

Sonymen qatar «Alash aınasy», «Lıter», «Ekspress-K» basylymdarynan da keńes barysy arqaý bolǵan tolyqqandy maqalalarmen tanys bola alasyzdar.

«Egemen Qazaqstan» gazetiniń jazýynsha, «Nur Otan» halyqtyq-demokratııalyq partııasy Tóraǵasynyń birinshi orynbasary Nurlan Nyǵmatýlın Frantsııanyń Qazaqstan Respýblıkasyndaǵy Tótenshe jáne Ókiletti elshisi Jan-Sharlem Bertonemen kezdesti. Kezdesý barysynda taraptar Qazaqstan Respýblıkasynyń Prezıdenti, "Nur Otan" partııasynyń kóshbasshysy Nursultan Nazarbaev pen Frantsııa prezıdenti Nıkolıa Sarkozıdiń arqasynda eki el arasynda tyǵyz iskerlik baılanys ornaǵanyn atap ótti. Sondaı-aq, eki el múddesine qatysty yntymaqtastyqtyń aldaǵy ýaqyttaǵy baǵyttaryn talqylady. Sóz oraıynda Jan-Sharl Bertone myrza Qazaqstannyń EQYU-ǵa tóraǵalyq ete bastaýymen quttyqtady.

«Egemen Qazaqstan» gazetiniń senbilik sanynda Qazaqstan Respýblıkasynyń Polsha Respýblıkasyndaǵy Tótenshe jáne Ókiletti Elshisi Alekseı Volkovtyń «Qazaqstan- Polsha: eski tanystyqtan - jańa yqpaldastyqqa» degen taqyryppen kólemdi maqalasy basyldy. «Qazaq-polıak ekonomıka salasyndaǵy qatynastarynyń negizin úsh mańyzdy úkimetaralyq kelisim quraıdy: Ekonomıkalyq yntymaqtastyq jónindegi kelisim, Investıtsııalardy tartý men ózara qorǵaý jónindegi kelisim, Qosarlanǵan salyq salýdy boldyrmaý jáne tabys pen kapıtalǵa salynatyn salyqtarǵa qatysty salyq salýdan jaltarýǵa jol bermeý týraly konventsııa. Yntymaqtastyqty damytýǵa ekonomıkanyń jekelegen salalaryndaǵy áreketterge baǵyttalǵan birqatar basqa da qujattar oń yqpal etip otyr», dep jazady maqala avtory. Elshi maqalasynyń tolyq nusqasyn basylymnyń búgingi sanynan oqı alasyzdar.

***

QR Bilim jáne ǵylym mınıstrligi Orta bilim berý departamentiniń málimetinshe, elimizde 311 mektep ǵımaraty apatty jaǵdaıda eken. Ortasha eseppen olardyń árqaısysynda 500-deı bala bilim alyp jatyr desek, onda 155 myńnan astam oqýshynyń ómirine qaýip tónip tur. Bilim berý salasynyń jyl saıynǵy esepteriniń kóleńkesinde jasyrynyp kele jatqan osy tárizdi taǵy bir másele - tórt aýysymmen oqytatyn mektepter jaıy. Mundaı bilim ordasy oqýshylarynan qandaı sapany talap etýge bolady? «Alash aınasy» gazetiniń senbilik nómirinde osy másele kóterilgen «Tórt aýysymda oqytatyn qazaq mektepterine sapany qalaı talap etemiz?» degen taqyryppen berildi.

Qazirgi tańda elimizde ádebıetke degen qamqorlyq pen mahabbat joǵalyp barady. Rýhanııattyń órkendeýine jetkilikti qoldaý kórsetilmeýi ıdeologııalyq daǵdarysqa soqtyryp jatady. Sondaı-aq zııaly sanalatyn keıbir tulǵalarymyzdyń qaraqan basynyń qamymen keıbir ultqa jany ashymaıtyn toptardyń múddesin qorǵaýy jıi kórinis bere bastady. Ádebıettaný, sóz óneriniń syny men qazirgi damýy jónindegi kózqarastarymen bólisken aqyn, Jazýshylar odaǵy basqarma tóraǵasynyń birinshi orynbasary, halyqaralyq «Alash» syılyǵynyń ıegeri Ǵalym Jaılybaı osylaı deıdi. «Ádebıet eshqashan bireýdiń talap qoıyp, tapsyrma berýimen jasalmaıdy» degen taqyryppen berilgen suhbattyń tolyq nusqasyn «Alash aınasy» gazetinen oqı alasyzdar.

«Alash aınasy» gazetiniń jazýynsha, túrik mýzykasyn álemge tanymal etken, álem halqynyń túrik áýenine degen jappaı qyzyǵýshylyǵynyń oıanýyna sebepker bolǵan jeztańdaı Tarkan qylmysty bolypty. Ony polıtsııa esirtkige qarsy júrgizilgen arnaıy shara kezinde serikterimen birge Ystambuldaǵy túngi klýbtardyń birinen ustaǵan. Biraq tártip saqshylary tutqyndaýdyń naqty sebebin jarııa etken joq. Dúnıejúziniń eń tabysty ánshileri sanatyndaǵy Tarkan buryn-sońdy qylmys álemi men túrli daý-janjaldarǵa qatysy joq juldyz sanalatyn.

***

«Jańaózen qalasyndaǵy «Jıhaz» saýda úıinde jarylys boldy. Úıindiniń astynda qalǵan eki adam qutqarylyp, aýrýhanaǵa jetkizildi. Qazir osyǵan baılanysty arnaıy komıssııa qurylyp, tıisti organdar oqıǵanyń saldaryn tekserip jatyr», dep jazady «Aıqyn» gazeti. Basylymnyń jazýynsha, jarylys tańerteńgi saǵat on jarym shamasynda oryn alǵan. Oqıǵanyń egjeı-tegjeıin gazettiń búgingi sanynda jaryq kórgen «Jańaózende jarylys boldy» degen maqaladan oqı alasyzdar.

«Aıqyn» gazetiniń dástúrli «Aq sóıle!» aıdarynyń búgingi qonaǵy ál-Farabı atyndaǵy Qazaq ulttyq ýnıversıtetiniń ǵylymı jumystar jónindegi prorektory, QR Injenerlik akademııasynyń akademıgi, fızıka-matematıka ǵylymdarynyń doktory, professor Nurlan Temirbekov. «Eldiń eń jetekshi oqý orny jańa Qazaqstan úshin jumys isteıdi» degen taqyryppen jarııalanǵan ekeýara áńgimeniń tolyq nusqasyn oqyǵyńyz kelse basylymnyń búgingi sanyna nazar aýdaryńyz.

***

«Keshe ákimdikte Astana qalasynyń áleýmettik áriptestik pen áleýmettik jáne eńbek qatynastaryn retteý jónindegi úshjaqty komıssııanyń otyrysy ótti. Oǵan qala ákiminiń orynbasary Aıda Balaeva men aımaqtyq, jergilikti atqarýshy organdardyń, kásipodaq uıymdarynyń, jumys berýshilerdiń ókilderi qatysty», dep jazady «Astana aqshamy» gazeti. Jaryq kórgen maqalanyń tolyq nusqasyn oqyǵyńyz kelse, basylymnyń senbilik nómirindegi «Úshjaqty áriptestik úılesimi» degen maqalaǵa nazar salyńyz.

Búgingi tańda álemde 50-ge jýyq áıel dırıjer bar eken. Olardyń arasynda názik jandylardyń mańdaıyna sırek bitetin bul mamandyqty ıgergen qazaq qyzdary da bar. Solardyń biri Baqytjan Musaqojaeva «Astana aqshamy» gazetiniń saýaldaryna tuşymdy jaýap bergen. «Dırıjerlikti men emes, dırıjerlik meni izdep tapty» degen taqyryppen basylǵan ekeýara áńgime basylymnyń aıqara betinde jarııalandy.

***

«Shyǵys Qazaqstan oblysynyń sharýa qojalyqtarynda úı janýarlary ashtyqtan kóptep qyrylyp jatyr. Máselen, Abyraly aýyldyq okrýginde qystaýdaǵy mal basynyń 50 paıyzǵa jýyǵy ólip qalǵan», dep jazady «Ekspress-K» gazeti.

Basylymnyń atap ótýinshe, qala halqyn qazirgi ýaqytta et óniminiń baǵasy tolǵandyryp otyrǵanǵa uqsaıdy. Qazirdiń ózinde bazardaǵy qoı etiniń baǵasy 150-200 teńgege qymbattap, kelisi 600-650 teńgege jetken. Dál osyndaı jaǵdaı Mońǵolııada da oryn alyp otyr. Resmı derekterge sáıkes atalǵan elde qazirdiń ózinde 1,5 mıllıonǵa jýyq bas mal ólgen.

«Nur Otan» HDP qoǵamdyq qabyldaýyna túsip jatqan azamattardyń ótinishterine sáıkes, memlekettik organdardyń jumysyn erekshe baqylaýǵa almaq. Bul týraly keshe partııanyń Ortalyq apparatynda ótken jumys jıynynda «Nur Otan» HDP Tóraǵasynyń birinshi orynbasary Nurlan Nyǵmatýlın málim etti.

Atalǵan jumys jıyn jaıyndaǵy materıaldardy «Lıter», «Aıqyn», «Egemen Qazaqstan» gazetterinen de oqı alasyzdar.