Semeıde «Hronıkadan bolashaqqa» respýblıkalyq kınolektorııi ótti
SEMEI. KAZINFORM — Prezıdent Teleradıokesheniniń aýqymdy aǵartýshylyq jobasy biregeı derekti fılmderdiń kórsetilimin eldiń shyǵysynda jalǵastyrdy. «Hronıkadan bolashaqqa» kınolektorııi — búgingi kórermendi qarapaıym qazaqstandyqtardyń taǵdyry, olardyń kásibı joly men ómirlik tańdaýlary týraly tereń oı qozǵaýǵa shaqyratyn taǵylymdy joba.
Semeı qalasynda Prezıdent Teleradıokesheniniń Derekti kıno ortalyǵynyń shyǵarmashylyq tobymen ótken kezdesý úlken ekrandaǵy «jandy» kórsetilimderdiń derekti fılm avtorlary men kórermen arasynda erekshe senim men ashyq dıalog atmosferasyn qalyptastyratynyn taǵy bir márte dáleldedi.
Prezıdent Teleradıokesheniniń 30 jyldyǵyna oraı uıymdastyrylǵan aýqymdy joba ulttyq tarıhtaǵy mańyzdy oqıǵalarmen, qoǵamdaǵy ózekti máselelermen jáne elimizdiń damý jolyn aıshyqtaıtyn adam taǵdyrlarymen tanystyrady. Bul fılmder óz dáýiriniń shejiresine aınalyp, ótken men búgindi tereń paıymdaýǵa múmkindik beretin mańyzdy qural qyzmetin atqarady.
— Mundaı jobalar jurtshylyqqa elimizde bolyp jatqan oń ózgeristerdi óz kózimen kórip, memleketpen jandy baılanysty tereńirek sezinýge múmkindik beredi. Olar patrıottyq sanany qalyptastyryp, ıgi ózgeristerdiń qazaqstandyqtardyń ómiri men taǵdyrynan kórinis tabatynyn aıqyn kórsetedi. Bul jetistikter Memleket basshysy Qasym-Jomart Toqaevtyń bastamasymen júzege asyrylyp jatqan «Taza Qazaqstan», «Adal azamat» jáne basqa da mańyzdy memlekettik baǵdarlamalardyń arqasynda múmkin bolyp otyr. Atalǵan bastamalar adal eńbek, ekologııalyq jaýapkershilik jáne azamattyq jaýapkershilik qundylyqtaryn ornyqtyrýǵa baǵyttalǵan, — deıdi Abaı oblysynyń ardagerler keńesiniń múshesi Ashat Dıýsembaev.
Kınolektorııdiń alǵashqy kúni semeılik kórermen nazaryna «ARAL» jáne «Sert» derekti fılmderi usynyldy. Bul týyndylar halyqtyń erekshe yqylasyna bólenip, olar alǵan áserlerimen bólisip, mazmundy ári shynaıy áńgime órbitti.
— «ARAL» derekti fılmi ekologııalyq apattyń zardaptaryn qurǵaq derektermen emes, bir adamnyń taǵdyry arqyly baıandaıdy. Fılmde úmit bar: Aral birtindep qaıta qalpyna kelip, ómir súrý men eńbek etýge jańa múmkindikter paıda bolyp keledi. Bul úmit Memleket basshysynyń ekojúıeni qalpyna keltirý jáne óńirdi damytýǵa baǵyttalǵan qoldaýymen tyǵyz baılanysty. Sondyqtan fılm ótken qasiretti eske salýdan góri, Araldyń bolashaǵy bar ekenin dáleldeıtin týyndy retinde qabyldanady. Fılm maǵan erekshe áser qaldyrdy, — deıdi semeılik turǵyn Nazgúl Adambekova.
Onyń pikirinshe, mundaı kınolektorııler qoǵammen birge ózekti máselelerdi talqylaýǵa múmkindik berip, kórermenniń osyndaı taqyryptarǵa qyzyǵýshylyǵyn arttyrady. Bul — derekti kınonyń basty qundylyǵy.
Kórermenderdiń adamgershilikke jáne memlekettiń qoldaýyna degen senimin nyǵaıtqan taǵy bir týyndy — «Sert» derekti fılmi boldy. Fılmde 2024 jylǵy sý tasqyny, myńdaǵan turǵynnyń basyna túsken aýyr synaqtar jáne sol qıyn kezeńde qazaqstandyqtardyń uıymshyldyq, ózara qoldaý men bir-birine kómektesýge daıyn bolý sekildi asyl qasıetteri jan-jaqty kórsetiledi. Memleket basshysy Qasym-Jomart Toqaevtyń tabıǵı apattan zardap shekken óńirlerde qalpyna keltirý jumystaryn shuǵyl bastaý jónindegi tapsyrmasy el úshin mańyzdy tirekke aınaldy. Qajetti kómek der kezinde kórsetildi.
— Sol kúnder eriksiz esime tústi. Elimizdiń batysy men soltústigindegi aǵaıyndardyń basyna túsken qıyndyqty estigende, biz de shet qalmadyq. Oblys atynan gýmanıtarlyq kómek jiberilip, barsha jurt ortaq maqsat jolynda jumyldy. Fılm halyqtyń birligi men qıyn sáttegi ózara qoldaýyn óte áserli kórsetken. Bul oqıǵalar memleket pen qoǵam birlese áreket etkende kez kelgen qıyndyqty eńserýge bolatynyn dáleldedi, — deıdi Semeı qalasynyń turǵyny Amantaı Bekturov.
Tarıhy tereń, mádenı murasy mol Semeı óńiriniń turǵyndary «Travel Kazakhstan» derekti fılmin de jyly qabyldady. Rýhanı jáne tarıhı-tanymdyq týrızmniń mańyzdy ortalyǵy sanalatyn Abaı oblysy ulttyq qundylyqtarymen erekshelenedi. Munda qazaq ádebıeti men rýhanııatynyń iri tulǵalarynyń murasyn tanytatyn tarıhı-mádenı nysandar oryn tepken.
Kórermenderdiń aıtýynsha, mundaı derekti fılmder óńirdiń týrıstik áleýetin keńinen tanytyp, jańa týrıstik baǵyttardy nasıhattaýǵa yqpal etedi. Memleket týrızmdi ekonomıkanyń jáne mádenı saıasattyń strategııalyq baǵyty retinde qarastyryp, ony damytýǵa aıryqsha kóńil bólip keledi. Memleket basshysynyń bul salaǵa erekshe nazar aýdarýy Qazaqstannyń baı tarıhı murasy men tabıǵı kórikti jerleriniń el azamattary men sheteldik qonaqtar úshin qoljetimdi ári tartymdy bolýyna múmkindik jasap otyr.
Kórermenge usynylǵan taǵy bir týyndy — «Aport» derekti fılmi. Belgili alma sortynyń tarıhy arqyly fılm ulttyq qundylyqtardy saqtaý men qorǵaýdyń mańyzyn kórsetedi. Týyndy Qazaqstannyń sımvolyna aınalǵan aport almasynyń qaıtalanbas dámi men hosh ıisin dáriptep qana qoımaı, onyń genetıkalyq qoryn saqtap, kóshet qoryn qorǵaýǵa atsalysyp júrgen ǵalymdardyń eńbegin de baıandaıdy. Bul — týǵan jerdiń baılyǵyna degen qurmet pen ony keler urpaqqa amanat etý týraly taǵylymdy fılm.
— «Aport» týraly kóp nárseni bilmeıtinimizdi osy fılmdi kórgende túsindim. Kúndelikti ómirde bul almany jaı ǵana jemis dep qabyldaımyz. Alaıda aporttyń erekshe dámi men ıisi, belgili bir tabıǵı ortaǵa ǵana beıimdeletini tańǵaldyrdy. Osyndaı ulttyq brendke aınalǵan dúnıelerdi nasıhattap, keıingi urpaqqa jetkizýdiń mańyzy zor dep oılaımyn, — deıdi kórermen Nurbolat Omarov.
Respýblıkalyq kınolektorıı buǵan deıin Astana, Qyzylorda, Túrkistan, Shymkent, Taraz, Aqtaý, Atyraý, Oral jáne Aqtóbe qalalarynda ótken.
Aldaǵy kúnderi joba Pavlodar men Petropavl qalalarynda jalǵasady. Keıin shyǵarmashylyq top Jezqazǵan, Qaraǵandy, Kókshetaý, Taldyqorǵan jáne Qonaev qalalaryna jol tartady. Joba 25 qyrkúıekte Almaty qalasynda qorytyndylanady.
Kınolektorıı kórsetilimderi Prezıdent Teleradıokesheniniń uıymdastyrýymen, óńir ákimdikteriniń qoldaýymen ótip jatyr. Kórsetilimderge kirý tegin.
