Memleket pen din arasyndaǵy qatynas aqparat quraldaryndaǵy materıaldardyń jarııalanýyna baılanysty - sarapshy pikiri

Búgin Astanada «Konfessııaaralyq kelisimdi qalyptastyrýdaǵy buqaralyq aqparat quraldarynyń roli» atty semınar barysynda Parlament Senatynyń Aqparattyq-saraptaý bóliminiń Bas konsýltanty Gúldárııa Janábilova osyndaı pikir bildirdi.

Memleket pen din arasyndaǵy qarym-qatynastardy retteýdegi buqaralyq aqparat quraldarynyń róli jóninde sóz qozǵaǵanda, eskerilýi tıis birneshe másele bar. «Birinshiden, memleket pen din arasyndaǵy qatynastarǵa qatysty máseleler eki jaqtyń da múddesin qanaǵattandyrarlyqtaı jaǵdaıda sheshilmegen. Ekinshiden, jańa ǵasyrda keıbir kúshter dindi paıdalana otyryp, qoǵamnyń bılik qurylymdaryna engileri keledi. Sondyqtan din men memleket arasyndaǵy nemese dinaralyq kelisim týrasynda sóz qozǵalǵanda neǵurlym salmaqty da saq bolǵan jón», - deıdi sarapshy.

Onyń aıtýynsha, kópdindi el bolyp esepteletin Qazaqstanda buqaralyq aqparat quraldarynyń atqaratyn roli zor. Jalpy buqaralyq aqparat quraldarynyń memleket pen din arasyndaǵy qatynastarǵa ıgi yqpalynyń kórinisi retinde dinaralyq sezder men forýmdarda kóterilgen mindetterdi nasıhattaý bolyp tabylady. «Soǵan qaramastan aqparat quraldarynda din máselesine qatysty jarııalanǵan kez kelgen materıaldy saraptap otyrǵan jón. Sebebi biz tek osy jol arqyly ǵana dinge qatysty aqparat aǵynyn durys arnaǵa bura alamyz. Buny aıtyp otyrǵandaǵy sebep, memleket pen din arasyndaǵy qarym-qatynastar árqashanda jaqsy bola bermegen. Adamzat damýynda kez kelgen dinniń nemese sol din ókiliniń bılikke talasyp otyrǵandyǵyn biz tarıh arqyly bilemiz. Osy áreketterdiń barlyǵy aqyr sońynda memleket pen dinniń bólinýine ákelip soqty. Búginde buqaralyq aqparat quraldary memleket pen dinniń arasyndaǵy qarym-qatynastarǵa yqpal ete alatyn birden-bir kúsh. Endeshe memleket pen dinniń arasyndaǵy qatynastardyń qalaı órbıtindigi - aqparat quraldaryndaryndaǵy dinge qatysty materıaldardyń qalaı jarııalaıtyndyǵynda», - dedi G.Janábilova.