Memleket páter aqysynyń 50 paıyzyn óteıdi: kimder kómek ala alady
ASTANA. KAZINFORM — Qazaqstanda jaldamaly baspanaǵa sýbsıdııa alatyn otbasylar sany 11 myńnan asty, dep habarlaıdy Ónerkásip jáne qurylys mınıstrliginiń baspasóz qyzmeti.
Memleket basshysynyń tapsyrmasyna sáıkes Qazaqstanda jeke turǵyn úı qorynan jalǵa alynǵan páterler men úılerdiń jaldaý aqysynyń bir bóligin sýbsıdııalaý qaǵıdalary qoldanylady. Baǵdarlamanyń operatory bolyp «Otbasy banki» AQ belgilengen.
Ataýly kómek qaǵıdaty azamattardyń ortaq jaýapkershiligin kózdeıdi, oǵan sáıkes jaldaý aqysynyń 50%-y memlekettik sýbsıdııa esebinen ótelse, qalǵan 50%-yn alýshy óz qarajaty esebinen tóleıdi.
Jalpy, 2022 jyldan beri qazaqstandyq 45 514 otbasy sýbsıdııa alǵan. 34 246 alýshymen jasalǵan shart merziminen buryn buzylǵan: qazirdiń ózinde 20 424 otbasy jalǵa beriletin jáne kredıttik turǵyn úıge ıe bolǵan, qaǵıda talaptary saqtamaýyna baılanysty 13 822 otbasymen jasalǵan sharttar buzylǵan. Búginde sýbsıdııa alýshylardyń sany 11 268 otbasyn quraıdy.
— Mundaı qoldaýǵa mynadaı sanattaǵy azamattar úmitker bola alady: birinshi jáne ekinshi toptaǵy múgedektigi bar adamdar, múgedektigi bar balalardy tárbıelep otyrǵan otbasylar, jetim balalar, kópbalaly otbasylar. Bul rette otbasynyń árbir múshesiniń sońǵy 6 aıdaǵy jıyntyq tabysy kúnkóris mınımýmynyń 1 eselengen mólsherinen aspaýy tıis. Sondaı-aq sanattar boıynsha turǵyn úıge muqtaj retinde ákimdikte esepte turǵanyn rastaý qajet. Sýbsıdııa tólemderin alý úshin ótinim «Otbasy banki» AQ-nyń resmı saıty arqyly beriledi, — dep túsindirdi QR Ónerkásip jáne qurylys mınıstrligi Qurylys jáne turǵyn úı-kommýnaldyq sharýashylyq isteri komıteti Turǵyn úı qatynastary basqarmasynyń basshysy mindetin atqarýshy Dáýbek Kerimbaev.
Ótinim berý barysynda turǵyn úıdi jalǵa berýshiniń kelisimin ETsQ arqyly rastaýy talap etiledi. Barlyq talap oryndalǵan jaǵdaıda «Otbasy banki», sýbsıdııa alýshy jáne jalǵa berýshi arasynda úshjaqty shart jasalady. Sýbsıdııalar memleket tarapynan shartta belgilengen kúnge sáıkes ýaqtyly tólenedi.
Osyǵan deıin baspanada 50%-ǵa deıin úlesi bar azamattar memlekettik turǵyn úıdi jekeshelendire alatynyn jazǵan edik.
