Memleket óniminiń kem degende 80 paıyzyn ózi óndirgende saýda qaýipsizdigi saqtalady - V.Kojevnıkov
ALMATY. Mamyrdyń 9-y. QazAqparat /Ádilet Musahaev/ - «FýdMaster» kompanııasy tóńiregindegi jeke bastyń qarjylyq múddelerine qatysty týyndaǵan daý-damaı jalpy otandyq sút ónimi salasyna keri áser etedi. Bul jaıynda QR Sút odaǵynyń atqarýshy dırektory Vladımır Kojevnıkov búgin arnaıy ótken baspasóz máslıhatynda aıtty,
dep habarlaıdy QazAqparat.
Dırektordyń aıtýynsha, óndiris salasynyń basshysyna qarsy rastalmaǵan aqparattyq shabýyl ósken tusta sheteldik ónimderge degen suranym arta túsken. «Endigi ýaqytta biz irimshiktiń 67 paıyzdan astamyn, súttiń 20, maıdyń 40 paıyzyn sheteldik ónimder esebinen tutynamyz. Sondyqtan otandyq sút óndirýshilerdiń jaǵdaıy bizdi alańdatýda. Jalpy ár memlekette saýda qaýipsizdigi saqtalýy kerek. Memleket ónimniń kem degende 80 paıyzyn ózi óndirip, qalǵany syrttan kelgen ýaqytynda saýda qaýipsizdigi saqtalady», deıdi V.Kojevnıkov.
Sondaı-aq ol jazǵy sút óniminiń 2-3 esege kóbeıgen ýaqytynda oǵan degen suranystyń azaıyp ketkendigin jáne otandyq ónimniń sapasy ımporttan esh tómen emestigin aıtyp ótti.
«2009 jyly biz «Nárli sút» baǵdarlamasyn daıyndaǵan edik. Bul baǵdarlama sút óndirisin ulǵaıtýǵa jaǵdaı jasaýdy, veterınarlyq baqylaýdy kúsheıtýdi, ádette sapasyz sút taratatyn kóshe saýdagerlerimen kúresti qarastyrady», dep atap ótti óz sózindeV.Kojevnıkov.
