Memleket ondaıdy keshirmeıdi: SІM Tına Kandelakıdiń Qazaqstanǵa kirgizilmeıtinin aıtty

ASTANA. KAZINFORM – Syrtqy ister mınıstrliginiń resmı ókili Aıbek Smadııarov reseılik telejýrnalıst Tına Kandelakıdiń Qazaqstanda orys tiliniń qoldanys aıasy tarylyp bar jatqany týraly málimdemesine pikir bildirdi.

«Kórshi eldegi azamattar, óz dostarymyzdyń bizdiń el týraly beıhabar ekeni adamdy kishkene ókpeletedi. Óıtkeni olardyń biz týraly aqparaty durys emes. Bizdiń elge kelip qalaı ómir súrip jatqanymyzdy óz kózimen kórsin. Oıdan shyǵaryp jaza bergenshe, áleýmettik jelide qyrylysqansha odan da ózimizdiń jumysymyzdy odan ári qaraı jalǵastyraıyq», — dedi SІM resmı ókili.

Degenmen, A.Smadııarov atalmysh jýrnalıstiń Qazaqstanǵa kire almaıtynyn aıtty.

«Tizim dep sizder qaıta-qaıta suraı beresizder. Naqty bir, eki, úsh degen tizim joq. Ol — jalpy ár memlekettiń óziniń ishki sharasy. Sizge bireý unamasa, úıińizge kirgizbeısiz ǵoı. Týra sol sııaqty biz de kirgizbeımiz. Kerek kezde shara qabyldanady. Ony naqty „búgin kirgizdińizder me, erteń kirgizesizder me“ dep talap etpeńizder. Memleket ondaıdy eshqashan keshirmeıdi. Ol Qazaqstanǵa kele qoımas, kelgen jaǵdaıda kirmeıdi», — dedi Aıbek Smadııarov.

Aıta keteıik, buǵan deıin reseılik telejýrnalıst Tına Kandelakı áleýmettik jelidegi paraqshasynda Qazaqstanda birneshe temirjol stansasynyń ataýy ózgerýin orys tiliniń aıasyn taryltý dep pikir bildirgen bolatyn.