Memleket oqytqan dárigerlerdi aýyldarǵa jiberemiz - mınıstr
Medıtsına qyzmetkerlerimen bas qosqan jıynda mınıstr dárigerler men medbıkelerdiń biliktiligin arttyrý, medıtsınalyq qyzmetterdiń sapasyn jaqsartý máselelerin sóz etti. Alǵashqy medıtsınalyq kómek kórsetýdi damytý qajettigin jetkizdi.
Mınıstrdiń sózinshe, bolashaqta turǵyndarǵa dárigerler smartfondar arqyly keńes berip, em qabyldaıdy. Keler jyldan bastap barlyq jerde medıtsınalyq kartalar men azamattar týraly aqparattar, qujattandyrý elektrondy túrde júrgiziledi. Árbir adamǵa elektrondy pasport jasalyp, medıtsınalyq esepter tek elektrondy túrde qabyldanady. Emhanalardaǵy júktemeler durys bólinip, turǵyndarǵa jaqyn jerlerden ýchaskelik dárigerler qyzmet kórsetpek.
«Búginde bir ýchaskelik dárigerge 2500-3000 adamnan qaralady. Bolashaqta ol júktemeni 1700-ge túsirýimiz qajet. Ary qaraı 1500-ge jetkizemiz. Sonda Sizderdiń qoldaryńyz bosaıdy. Ekinshiden, elimizde úlken-úlken emhanalar salynyp ketken. Onda 30-40 ýchaskelik dárigerden otyrady. Ol jerge halyq alystan kelýge májbúr bolady. Ýaqyt joǵaltady, kelýge qınalady. Sondyqtan qalalyq jerlerde ýchaskelik dárigerlerdi biriktirip, halyqqa jaqyn jerlerden qyzmet kórsetý jaǵyn qarastyramyz. Budan bylaı úlken emhanalar salynbaıdy. Ol úshin jekemenshik áriptestik aıasynda jeke dárigerlerdi tartamyz. Sonda halyq dárigerge jıi qaralyp, aýrýlardy baqylaýǵa múmkindik alamyz»,-dedi mınıstr Eljan Birtanov.
Onyń sózinshe, Elbasynyń tapsyrmasy boıynsha, bes jyldyń ishinde jalpy ishki ónimniń 10 paıyz qarajaty densaýlyq pen bilim salasyna bólinbek.
«Ol bizder úshin óte úlken qoldaý bolmaq. Biz bul qarajatty aýyldyq medıtsınaǵa, ondaǵy emdeý mekemelerine bólýimiz qajet. Kerek degen zamanaýı medıtsınalyq quraldarmen qamtamasyz etemiz. Arnaıy standarttar qabyldanǵan aýyldyq aýrýhanalardy jedel-járdem qyzmetimen qamtamasyz etý boıynsha mınıstrlik tarapynan qarajattar bólinedi»,- dedi mınıstr.
