Memleket Nazarbaev ýnıversıtetin aldaǵy úsh jyl boıy qarjylandyrady
ASTANA. KAZINFORM — Ǵylym jáne joǵary bilim mınıstri Saıasat Nurbek Nazarbaev ýnıversıtetine bólinetin qarjyǵa bilim tapsyrysy jáne maqsatty depozıtter kiretinin málim etti.
«Nazarbaev ýnıversıtetine ótken jyldaǵydaı shamamen 42 mlrd teńge qarjy bólemiz. Aldaǵy 3 jylda ýnıversıtetke qoldaý kórsetetin bolamyz. Memleketten bólingen qarjyǵa memlekettik bilim tapsyrysy jáne maqsatty depozıtter kiredi. Sondyqtan, alańdaýdyń qajeti joq», — dedi Saıasat Nurbek Úkimet otyrysynan keıin ótken baspasóz máslıhatynda.
Sonymen qatar mınıstr aldaǵy 3 jyl boıy bólinetin qarjynyń bıýdjette bekitilgenin aıtty.
Eske salsaq, byltyr Ǵylym jáne joǵary bilim mınıstrligi Nazarbaev ýnıversıtetin qarjylandyrý kólemi jyldan-jylǵa azaıyp kele jatqanyn habarlaǵan edi.
«2020 jyly Nazarbaev ýnıversıtetin qarjylandyrýǵa respýblıkalyq bıýdjetten 55 243 246,6 myń teńge, 2021 jyly — 57 384 102,2 myń teńge, 2022 jyly — 45 038 666,7 myń teńge, al 2023 jyly — 42 571 878,8 myń teńge bólindi. Sońǵy eki jylda qarjylandyrý somasy ótken jyldarmen salystyrǵanda azaıdy», — dep jaýap berdi mınıstrlik Kazinform saýalyna.
