Memleket menshigine qaıtarylyp jatqan kompanııanyń kesirinen 17 eldi meken jaryqtan tapshylyq kórip otyr
ASTANA. KAZINFORM — Májiliste memleket menshigine qaıtarylyp jatqan «Shet-Energo» jaýapkershiligi shekteýli seriktestiginiń aınalasyndaǵy júıesiz jumystan 17 eldi mekenniń turǵyndary zardap shegip otyrǵany málim boldy.
— Biz «Shet-Energo» JShS boıynsha problemalardy talaı kóterdik. Ol kompanııa memleket qaıtarylatyny týraly sot sheshimi shyqqan. Qazirgi tańda ahýal eshqandaı da ózgergen joq. 17 eldi meken elektr qýatynyń joqtyǵynan qalaı zardap shegip kelse, áli solaı zardap shegip otyr. Únemi jel soqsa, jaýyn ótse boldy jaryq óshedi. Kesirinen turǵyndardyń teledıdary, tońazytqyshy kúıip ketken jaıttardy óz kózimizben kórdik. Bul másele qashan alǵa jyljıdy, — dep surady Arman Qalyqov.
Mınıstr ondaı problema bar ekenin moıyndady. Biraq kompanııa túbegeıli memleket menshigine ótkenshe turǵyndar zardap shege beretinin aıtty.
— «Shet-Energo» boıynsha aıtsaq, problemanyń qalyptasqanyna eki jyl boldy-aý deımin. Turǵyndardy sapaly elektr energııasymen qamtamasyz etý isi sol jeliniń tehnıkalyq jaı-kúıine baılanysty. «Shte-Energonyń» menshik ıesi monopolııasyzdandyrý komıssııasynyń nazaryna ilikkenge deıin de bul mekemeniń jaǵdaıy syn kótermeıtin. Iesi jelini jumys isteıtindeı jaǵdaıda kútip tustaýǵa eshqandaı qarjy salmaǵan. Sondyqtan, aıtyp otyrǵandaryńyz, árıne ras. Jel soqsa da, jańbyr ne qar jaýsa da turǵyndar elektr qýatynan ajyratylady. Jóndeý júrgizý úshin jeliniń naqty ıesi bolýy kerek. «Shet-Energo» memleket menshigine berilgen kúni-aq bul máseleni birden sheshemiz. Máseleni sheshý úshin jeliniń ıesi bolýy kerek. Búgingi tańda ondaı ıesi joq deýge bolady. Qazir sot sheshimin kútip otyrmyz. Menshik ıesin sot anyqtaıdy. Onsyz jóndeý jumystaryna bıýdjet ótinimin bere almaımyz, — dedi Erlan Aqkenjenov.
Aıta ketý kerek, atalǵan kásiporyn Qaraǵandy oblysynyń Shet aýdanyndaǵy turǵyndarǵa qyzmet kórsetip kelgen.
Sondaı-aq, ótken aptada Energetıka mınıstrligi Ekibastuzda jańa elektr stantsııasyn salýǵa tender jarııalaǵan edi.