Memleket menshigine qaıtarylǵan jerdiń 3,7 mln gektary qaıta bólindi
ASTANA. KAZINFORM – Memleketke qaıtarylǵan aýyl sharýashylyǵy jer telimderin qaıta bólý tek konkýrstyq negizde júzege asyrylady.
«Qazir memleket menshigine qaıtarylǵan jerlerdiń 3,7 mln gektary qaıta bólindi. Bul rette, birinshi kezekte memleket menshigine qaıtarylǵan jaıylymdardy eldi mekenderge bekitý jolymen jeke aýladaǵy mal basyna qajet suranysqa bólinip jatyr. Jer kodeksine sáıkes, jer ýchaskelerin alýǵa quqyq berý jergilikti atqarýshy organdardyń quzyretinde, al olardyń ádil berilýine baqylaýdy Jer resýrstaryn basqarý komıtetiniń aýmaqtyq bólimsheleri júzege asyrady. 2022 jylǵy 28 sáýirde Memleket basshysynyń tapsyrmasy negizinde qurylǵan paıdalanylmaǵan nemese zańnamany buza otyryp berilgen jerlerdi qaıtarý komıssııasy jumys istep jatyr. Sonymen qatar, qoǵamdyq baqylaý bóliginde «Amanat» partııasynyń janynan qurylǵan Jer amanaty komıssııasy da bar», - delingen Aýyl sharýashylyǵy mınıstrliginiń Kazinform agenttigine bergen jaýabynda.
Vedomstvo málimetine qaraǵanda, maqsat boıynsha paıdalanylmaıtyn aýyl sharýashylyǵy jerlerin májbúrlep qaıtarý rásimi keminde eki jyl ýaqyt alady. Budan basqa, jerdi paıdalaný qajet ekeni týraly nusqama berilgennen keıin, olarǵa bazalyq salyq stavkasyn jıyrma ese ulǵaıtý qoldanylady. Osyǵan baılanysty memlekettik ınspektordyń aktisin alǵannan keıin, jer paıdalanýshy ýchaskeni ıgerý boıynsha óziniń múmkindikterin naqty baǵalaı otyryp, óz erkimen memleket menshigine qaıtarýǵa quqyly.
«Bul rette, arnaıy jer qoryna kirgen bos jerdi qaıta bólý tek konkýrstyq negizde júzege asyrylady. Osyǵan baılanysty burynǵy jer paıdalanýshynyń jer ýchaskesin qaıtadan alý múmkindigi ekitalaı. Sonymen qatar, Aýyl sharýashylyǵy mınıstrliginiń Jer resýrstaryn basqarý komıtetiniń aýmaqtyq bólimsheleri, jergilikti atqarýshy organdardyń Qazaqstan Respýblıkasynyń jer zańnamasy salasynda qabyldaǵan sheshimderiniń zańdylyǵyna memlekettik baqylaýdy atqaryp jatyr», - dep atalyp ótken mınıstrlik aqparatynda.
Aıta keteıik, 2022 jyldyń basynan beri paıdalanylmaıtyn 10 mln gektar aýyl sharýashylyǵy jeri memleket menshigine qaıtaryldy.
