Memleket menshigine qaıtarylǵan 12,2 mln gektar jerdiń jartysy ıgerýge berildi
ASTANA. KAZINFORM — Bul málimetter Úkimet úıinde Premer-mınıstrdiń orynbasary — ulttyq ekonomıka mınıstri Serik Jumanǵarınniń tóraǵalyǵymen ótken Jer resýrstaryn utymdy paıdalaný máseleleri jónindegi respýblıkalyq komıssııa otyrysynda aıtyldy.
Aýyl sharýashylyǵy mınıstrligi Jer resýrstaryn basqarý komıtetiniń (JRBK) málimetinshe, 2022–2024 jyldary memlekettik menshikke qaıtarylǵan 12,2 mln gektar jerdiń 5,9 mln gektary qaıta bólindi. Onyń ishinde, eldi meken mańyndaǵy 2 mln gektar jaıylym jergilikti halyqtyń mal jaıýy úshin ortaq paıdalanýǵa berildi. Qalǵan 3,9 mln gektar jer aýyl sharýashylyǵy taýar óndirýshileri arasynda konkýrs arqyly taratyldy.
Sońǵy úsh jylda jergilikti ınspektsııalardyń aralasýynan keıin buryn paıdalanylmaı jatqan 3,8 mln gektar jerdi burynǵy jer ıeleri qaıta ıgere bastady.
2025 jyly memlekettik menshikke qaıtarylýy josparlanǵan 2 mln gektar aýyl sharýashylyǵy aınalymyndaǵy jerdiń qazirdiń ózinde 979,1 myń gektary qaıtaryldy.
Jer resýrstaryn basqarý komıtetiniń tóraǵasy Murat Temirjanov aýyl sharýashylyǵy maqsatyndaǵy jerlerdi tıimdi ári ashyq bólý tetikterin ázirleý boıynsha atqarylyp jatqan jumystar týraly baıandady. Negizgi qadamdardyń biri — málimetterdi tsıfrlandyrý jáne jer telimderin bólý boıynsha elektrondy konkýrstarǵa kóshý.
— Búginge deıin shól jáne shóleıt alqaptardy qospaǵanda, aýyl sharýashylyǵy aınalymyndaǵy barlyǵy 205,5 mln gektar jer tsıfrlandyryldy. 2025 jyldyń sońyna deıin kartalar derekterin tıisti koordınattyq júıege júkteý josparlanyp otyr, — dep jalǵastyrdy Murat Temirjanov.
Sonymen qatar jıynda belsendi aýyl sharýashylyǵy taýaryn óndirýshilerdiń jer paıdalaný quqyǵyn uzartý jáne maýsymdyq sharýashylyqtardyń qyzmetin retteý máseleleri qaraldy.
Aıta ketelik Abaı oblysynda 64,2 myń gektar paıdalanylmaǵan jer memleket menshigine qaıtaryldy.