Memleket MÁMS boıynsha 500 mlrd teńge kem tólegen – Aımaǵambetov

ASTANA. KAZINFORM – Ótken jyly Qazaqstannyń densaýlyq saqtaý júıesi memleketten shamamen 500 mlrd teńge kem aldy. Bul týraly Májilis depýtaty Ashat Aımaǵambetov málimdedi. Ol dál osy sebepten emhanalarda uzyn-sonar kezek paıda bolyp, qazaqstandyqtarǵa keıde tegin dári-dármek jetpeı qalatynyn atap ótti.

MÁMS júıesinde árbir azamat aı saıyn jalaqysynan 2% jarna tóleıdi. Jumys berýshi de ár qyzmetkeri úshin qosymsha 3% aýdarady.

— Budan bólek, 15 sanattaǵy azamattar bar: zeınetkerler, balalar, stýdentter jáne taǵy basqalar. Olar úshin jarnany memleket tóleýi tıis. Zań boıynsha — ortasha jalaqynyń 2%-y kóleminde. Al is júzinde ne bolyp jatyr? Azamattar men jumys berýshiler jarnany ýaqtyly tóleıdi. Tólemese — birden júıeden shyǵarylady, medıtsınalyq kómek toqtaıdy, — dedi Aımaǵambetov.

Onyń aıtýynsha júıe jyl saıyn 250 mlrd teńge joǵaltady.

— Al memleket she? Qarjy mınıstrligi jarnany ortasha emes, medıandyq jalaqydan esepteıdi. Bul — zań buzýshylyq. Orta eseppen júıe jyl saıyn 250 mlrd teńge joǵaltady. 2024 jyly tipti osy azaıtylǵan jarnanyń jartysy ǵana tólengen. Sonyń saldarynan densaýlyq saqtaý júıesi 2024 jyly 500 mlrd teńgeden astam qarajattan qaǵyldy. Bul jaı ǵana san emes. Osy qarajattyń túspeýine baılanysty, emhanalardaǵy uzyn-sonar kezek, qoljetimsiz analızder men dári-dármek, jáne ýaqytynda kómek ala almaǵan myńdaǵan adam. Sonda qalaı bolady? Azamat tólemese — júıeden shyǵarylady. Al memleket tólemese — eshteńe bolmaıdy. Eshkim jaýap bermeıdi. Zań bárine ortaq bolýy kerek, — dedi depýtat.

Aıta ketelik MÁMS boıynsha memleket jarnalarynyń mólsheri birtindep artady.