Memleket kepildik bergen tegin zańger kómegin qalaı alýǵa bolady
ALMATY. QazAqparat- Óńirlik kommýnıkatsııalar qyzmetinde ótken baspasóz máslıhatynda Almaty qalalyq Ádilet departamenti basshysynyń orynbasary Berikbol Sámenov advokattardyń kómegine kimderdiń quqyǵy bar ekenin aıtty, dep habarlaıdy QazAqparat tilshisi.
Spıkerdiń sózinshe, 2022 jyly Almaty qalalyq advokattar alqasynyń qorǵaýshylary memleket kepildik bergen 14 589 azamatqa quqyqtyq kómek kórsetken.
«Quqyqtyq keńes alý úshin qala turǵyndaryna Almaty qalalyq advokattar alqasyna kelýi kerek. Qazirgi ýaqytta Almaty qalasynda 15 osyndaı keńes jumys isteıdi, olarǵa memleket kepildik bergen zań kómegin alýǵa quqyǵy bar adamdar júgine alady. Zań konsýltatsııalarynyń mekenjaılarymen Almaty qalasy Ádilet departamentiniń resmı saıty arqyly nemese 119 jáne 1414(Quqyqtyq aqparattyq qyzmet) nómirine qońyraý shalý arqyly bilýge bolady. Sonymen qatar, Qazaqstan Respýblıkasynyń búkil aýmaǵynda telefon keńes alýǵa bolady», - dedi Berikbol Sámenov.
Sondaı-aq ol azamattarǵa kepildendirilgen memlekettik kómek pen zańgerlik kómek ádilet organdarynyń mańyzdy baǵyttarynyń biri ekenin túsindirdi.
«Árkimniń qorǵanýǵa quqyǵy bar ekenin bári biledi. Biraq eger adamnyń advokat jaldaýǵa múmkindigi bolmasa, onda oǵan bıýdjet esebinen memleket kepildik bergen zań kómegi kórsetiletinin bári bile bermeıdi. Qazaqstan Respýblıkasynyń Konstıtýtsııasy men zańdaryna sáıkes árkimniń azamattyq, ákimshilik jáne qylmystyq sot isin júrgizý kezinde bilikti zań kómegin alýǵa quqyǵy bar», - ol.
Memleket kepildik bergen zań kómegi mynadaı nysanda kórsetiledi: quqyqtyq keńes berý, sottarda, qylmystyq qýdalaý organdarynda jeke tulǵalardyń múddelerin qorǵaý jáne bildirý jáne t.b.
Memleket kepildik bergen zań kómegin advokattar, notarıýstar jáne jeke sot oryndaýshylary alıment, zeınetaqy men járdemaqy óndirip alý, ońaltý, bosqyn nemese kandas mártebesin alý, ata-anasynyń qamqorlyǵynsyz qalǵan kámeletke tolmaǵandarǵa, jynystyq zorlyq-zombylyq qurbandaryna, adam saýdasyna, eńbekpen baılanysty densaýlyǵyna keltirilgen zııannyń nemese qylmystyq quqyq buzýshylyqtyń saldarynan keltirilgen zııandy óteý máseleleri boıynsha tegin kórsetedi.
«Ekinshi dúnıejúzilik soǵysyna qatysýshylarǵa, sondaı-aq soǵan qatysýshylarǵa jeńildikterge teńestirilgen adamdarǵa, basqa memleketterdiń aýmaǵyndaǵy soǵys qımyldaryna qatysýshylarǵa, áskerı qyzmetshilerge, birinshi jáne ekinshi toptaǵy múgedekterge, jasy boıynsha zeınetkerler, kásipkerlik qyzmetpen baılanysty emes máseleler boıynsha, kásipkerlik qyzmetpen baılanysty emes máseleler boıynsha kóp balaly otbasylar, az qamtylǵan tulǵalarǵa da kórsetiledi»,- Almaty qalalyq Ádilet departamentiniń ókili.
Aıtýynsha, joǵaryda atalǵan adamdardyń barlyǵy turǵylyqty jeri men ornalasqan jerine qaramastan Qazaqstan Respýblıkasynyń aýmaǵynda memleket kepildik bergen zań kómegin alýǵa quqyly.
