Memleket qazynasyna 77 mln teńge tústi: prokýratýra salyq zańbuzýshylyǵyn anyqtady
ASTANA. KAZINFORM — Batys Qazaqstan oblysynyń Tasqala aýdanynda salyq zańbuzýshylyǵy anyqtalyp, prokýrorlyq qadaǵalaý nátıjesinde memlekettik bıýdjetke 77 mln teńge tústi. Bul týraly BQO prokýratýrasy málim etti.
BQO Tasqala aýdanynyń prokýratýrasy salyq zańnamasynyń saqtalýyn taldady.
— Taldaý elektrondyq shot-faktýralar derekterin 300.00 nysanyndaǵy salyq eseptiligimen salystyrý nátıjesinde «J» JShS tarapynan qosylǵan qun salyǵy somasyn tómendetý faktisin anyqtady, — delingen habarlamada.
Bul rette ýákiletti organ kameraldyq baqylaý nátıjesinde anyqtalǵan buzýshylyqtardy joıý týraly habarlama joldaý boıynsha tıisti sharalar qabyldamaǵan.
Prokýrorlyq qadaǵalaý aktisi negizinde anyqtalǵan zań buzýshylyqtar joıylyp, memlekettik bıýdjetke 77 mln teńge kóleminde mindetti salyq tólemderiniń túsýi qamtamasyz etildi.
Buǵan deıin prokýratýra BQO-da 100-ge jýyq qyzmetshige eńbek demalysy aqysy merziminde tólenbegenin anyqtaǵan edi.
