Memleket qaıratkeri, eks-senator Nurlyǵaıym Joldasbaeva dúnıeden ótti

Nurlyǵaıym Joldasbaeva 1954 jyly 5 sáýirde Taldyqorǵan oblysy Djerjınskıı aýdanynyń Nadejdovka aýylynda týǵan. Qazaq memlekettik ýnıversıtetin zańger mamandyǵy boıynsha bitirip, 24 jyl ómirin quqyq qorǵaý organdaryndaǵy qyzmetke arnady: Shevchenko qalasy halyq sýdıasy, Gýrev, Mańǵystaý oblystyq sottary tóraǵalarynyń orynbasary, QR Joǵarǵy sotynyń sýdıasy bolyp 8 jyl qyzmet atqardy.

2003 jyly elimiz Prezıdentiniń Jarlyǵymen QR Parlamenti Senatynyń depýtaty qyzmetine taǵaıyndaldy, 2007 jyldan QR Parlamenti Senatynyń Ekonomıkalyq jáne óńirlik saıasat turaqty komıtetiniń tóraıymy qyzmetine saılandy.

2011 jyly depýtattyq qyzmeti merzimi aıaqtalýyna baılanysty QR Joǵarǵy Soty tóraǵasynyń keńesshisi qyzmetine taǵaıyndaldy.

Nurlyǵaıym Shaldanqyzy eńbek etýge jan-tánimen berilgen, ózine júktelgen mindetti kásibı túrde ári jaýapkershilikpen atqaratyn eńbek súıgish jandardyń biri boldy. Ár zańdaǵy erejelerdi jadynda ustaıtyn ol óz isin jetik biletin, erekshe bilikti zańger edi. Áriptesteriniń arasynda qurmetke ıe bolǵan atqarǵan aýqymdy isterine oraı 2001 jyly «Elimizdiń qurmetti sýdıasy» ataǵyna ıe boldy. El Parlamentiniń Senatynda qyzmet atqarǵan jyldary ózin azamat, saıasatker jáne memleket qaıratkeri retinde kórsete bildi, eldiń qaryshty damýyna, halyqtyń ál-aýqatyn kóterýge jáne Qazaqstannyń bedelin nyǵaıtýǵa járdemdesetin kóptegen zańdardy qabyldaýǵa belsene aralasty. 2005 jyly «Qurmet» ordenimen marapattaldy.

N.Sh.Joldasbaeva erik-jigeri mol, qaısar azamat boldy, aýyr syrqatqa moıynsunbaı qarsy kúrese bildi. Ol ómirden mezgilsiz ótti, onyń artynda jubaıy, balalary, nemereleri, týystary, dostary, áriptesteri qaldy.

«Nurlyǵaıym Shaldanqyzy bizdiń jadymyzda ómirge qushtar, ashyq-jarqyn minezdi, daryndy zańger ári zań shyǵarýshy, naǵyz dos ári áriptes retinde árqashan saqtalady», - delingen sot júıesindegi, depýtattyq qyzmetindegi serikteriniń, dostary men joldastarynyń respýblıkalyq basylymdarda jarııalanǵan qazanama mátininde.