Memleket kásiporyndardyń óndiristi jańǵyrtýǵa jumsaǵan 400 mln teńgeden astam shyǵynyn ótedi
ASTANA. KAZINFORM – Osy jyldyń 8 aıynyń qorytyndysy boıynsha memleket el kásiporyndarynyń óndiristi jańǵyrtý jáne eńbek ónimdiligin arttyrýǵa jumsalǵan shyǵyndarynyń 40-tan 50%-ǵa deıingi kólemin ótep, jalpy somasy 418,7 mln teńgeniń qarjylaı qoldaýyn kórsetti.
Tarata aıtqanda, mashına jasaý, metallýrgııa, agroónerkásiptik keshen, jeńil, hımııa, farmatsevtıka jáne aǵash óńdeý ónerkásibi salalaryndaǵy kásiporyndarǵa qoldaý bildirildi.
Qarajattyń basym bóligi, ıaǵnı shamamen 416,1 mln teńge tehnologııalyq jabdyqtardy satyp alýǵa, tsıfrlyq sheshimderdi engizýge, personaldy oqytýǵa jáne basqa da maqsattarǵa qatysty shyǵyndardy óteýge baǵyttaldy. Ótinimderdiń kóbi Shymkent jáne Almaty qalalarynan, sondaı-aq Qaraǵandy, Batys Qazaqstan jáne Pavlodar oblystarynan kelip tústi.
Budan bólek, memleket QazIndustry arqyly ónimderdi naryqta ilgeriletýge, onyń ishinde halyqaralyq sertıfıkattaýǵa jáne zerthanalardaǵy synaqtarǵa, sondaı-aq sáıkestendirý quraldaryn, sonyń ishinde aıaq kıim ónimderin tańbalaýǵa arnalǵan baǵdarlamalyq qamtamasyz etýdi satyp alýǵa jumsalǵan shyǵyndardy óteıdi. Esepti kezeńde bıznes sýbektileriniń osyndaı shyǵyndar boıynsha 2,5 mln teńgeden astam qarajat óteldi.
Ónerkásip jáne qurylys mınıstrligi óńdeý sektoryn qoldaýdyń jańartylǵan quraldaryn da engizdi. Onyń aıasynda bıznes sýbektileriniń basymdyq berilgen taýarlardy el ishinde temirjol kóligimen tasymaldaýǵa jumsaǵan shyǵyndarynyń jartysy óteledi. Sonymen qatar halyqaralyq sertıfıkattaýǵa jumsalǵan shyǵyndardy óteý mólsheri bes esege ulǵaıtylyp, 15 000 AEK-ke deıin jetkizildi.
Aıta ketelik óndiristi jańǵyrtqan kásiporyndarǵa memleketten 145,5 mln teńge ótemaqy berilgen edi.
