Memleket qarjysyna salynǵan Óskemendegi zaýyt bir kún de jumys istemegen
ASTANA. QazAqparat - Shyǵys Qazaqtan oblysynda Indýstrııalandyrý baǵdarlamasy boıynsha memlekettiń 750 mln teńge qarjysyna salynǵan eki nysan áli kúnge deıin iske qosylmaǵan, dep habarlaıdy Altaynews.kz saıty.
Olardyń biri Aıagózdegi qurylys materıaldary kombınaty. Bul nysanǵa memleketten 400 mln teńge bólingen, sondaı-aq barlyq qajetti kommýnıkatsııalar tartylǵan. Onyń burynǵy ıesi Qýat Ábjanovtyń sózinshe, ol salynyp bitpegen nysandy basqa adamǵa satyp jibergen.
«Aramza adamdar bıznesti damytýǵa degen bizdiń túzý nıetimizdi paıdalanyp jatyr. Qýat Ábjanov barlyǵymyzdy aldap ketti. Buǵan qosa, barlyq basqarmalar osy jobaǵa qol qoıǵan, biraq qaýip-qaterlerdi tolyq taldamaǵan. Shyn máninde ol jerde eshkim jumys istegisi kelmegen. Problemalyq qurylysty sheship, barlyq qajetti sharalardy qabyldaý týraly tapsyrma beremin», - dedi ShQO ákimi Danıal Ahmetov.
Dál osyndaı jaǵdaı kún batareıalaryn óndirýi tıis bolǵan iri metallýrgııalyq zaýytqa qatysty týyndady. Jumsalǵan qarjynyń somasy 350 mıllıon dollardy quraıdy. Alaıda, iri kólemdegi memleket shyǵynyna qaramastan, kásiporyn áli kúnge deıin ónim óndirýge kirispegen.
«Osy másele boıynsha da mán-jaıdy anyqtaý kerek. Bul nysan bir kún de jumys istegen joq. Oǵan qosa, usynylǵan tehnologııa eskirip jatyr. Bul, memleket qarjysy jelge ushty degen sóz», - dedi óńir basshysy.
Aıta keteıik, Indýstrııalandyrý baǵdarlamasy boıynsha oblysta 2019 jylǵa deıin 892 mıllıard teńgege 70 ınvestıtsııalyq joba iske qosylýy tıis. Bul 14 myń adamdy jumyspen qamtýǵa múmkindik beredi.
