Memleket qarjysyn jymqyrǵan qyzylordalyq esepshi sottaldy
QYZYLORDA. QazAqparat - Qyzylorda qalalyq bilim bóliminiń burynǵy esepshisine qatysty qylmystyq iske núkte qoıyldy, dep habarlaıdy QazAqparat.
Qyzylorda qalalyq soty memleketke alty jarym mıllıon teńgeden astam zalal keltirgen qarjygerge jalpy 7 jyl bas bostandyǵynan aıyrý jazasyn taǵaıyndady. Alaıda raqymshylyq zańyna sáıkes ol temir tordyń arǵy jaǵyna úsh jarym jylǵa toǵytylmaq.
«Sottalýshynyń kámeletke tolmaǵan balalary bar. Sol sebepti eks-býhgalter olardyń jasy 14-ke tolǵannan keıin qamaýǵa alynady. Sondaı-aq ol ómir boıyna býhgalterlik qyzmetpen aınalysý quqyǵynan aıyrylyp otyr», - dep málimdedi Qyzylorda qalalyq sotynyń baspasóz qyzmeti.
Sot protsesi kezinde burynǵy esepshi óz kinásin tolyqtaı moıyndaǵan. Onyń 2015-2016 jyldary memleket qarjysyn jymqyrǵany dáleldengen. Qazirgi tańda sottalǵan maman keltirilgen shyǵynnyń 2 mıllıon teńgesin ótegen. Sottyń talaby boıynsha, ol qarjynyń qalǵan bóligin bir aıdyń ishinde bıýdjetke qaıtarýy tıis. Osy ýaqyt ishinde bul mindet oryndalmasa, májbúrli túrde óndirý júrgiziledi.
Aınur Tóleshova
