Memleket qarjysyn alaıaqtyq jolmen ıemdengen aqtóbelik depýtat sottaldy
AQTÓBE. QazAqparat - Aqtóbe oblystyq máslıhatynyń depýtaty, kásipker Baqytjan Erjanov shartty túrde sottaldy, dep habarlaıdy QazAqparat tilshisi.
Aqtóbe oblystyq máslıhatynyń depýtaty, kásipker Baqytjan Erjanov Qylmystyq kodekstiń «Alaıaqtyq», «Quqyq qorǵaý organy, arnaýly memlekettik organ qyzmetkeriniń, áskerı qyzmetshiniń ómirine qolsuǵýshylyq», «Densaýlyqqa qasaqana aýyr zııan keltirý» baptary boıynsha aıyptalǵan bolatyn. Buǵan deıin habarlaǵanymyzdaı, depýtat óz áıeliniń atyndaǵy sharýa qojalyǵynan asyl tuqymdy maldy satyp alyp, memleketten sýbsıdııa rásimdegen. Sonymen qatar, qolastyndaǵy jumysshyny uryp, prokýrorǵa beıádep sózder aıtqan.
Іs materıalyna súıensek, Baqytjan Erjanov Hromtaý aýdandyq prokýratýrasynyń prokýrory J. Espanovqa «Jánibek saǵan eskertemin, maǵan jamandyq isteseń jamandyq isteý meniń qolymnan da keledi. Maǵan áliń kelmeıdi» dep ómirine naqty qaýip-qater tóndirgen. Birneshe aıǵa sozylǵan tergeý jumystarynan soń is sotqa jetip, úkim shyqty.
«Baqytjan Erjanov Qymystyq kodekstiń 190-baby, 4-bóligi, 2-tarmaǵy, 380-baby 1-bóligi, 106-baby, 1-bóliginde kórsetilgen qylmysty jasaýda kináli dep tanylyp, 3 jyl memlekettik qyzmetpen aınalysý quqyǵynan, 3 jyl 9 aıǵa bas bostandyǵynan aıyrý jazasy taǵaıyndalsyn. Qylmystyq kodekstiń 63-babyn qoldanyp, taǵaıyndalǵan jazany shartty dep eseptep, barlyq synaq merzimine probatsııalyq qadaǵalaý taǵaıyndalsyn. Úkim zańdy kúshine engenge deıin kúzetpen ustaý túrindegi bultartpaý sharasyn eshqaıda ketpeý jáne ózin durys ustaý qolhatyna ózgertip, sot zalynan dereý bosatylsyn», - dedi Hromtaý aýdandyq sotynyń sýdıasy A.Balmuhanov.
Sotymen qatar, Baqytjan Erjanov 281 myń teńge sot shyǵynyn óteýi tıis. Ári barlyq jábirlenýshilerdiń keshirimin alyp, memlekettik zalal tolyq óteldi. Іs materıalynda, Baqytjan Erjanovtyń Qylmystsyq kodekstiń «Alaıaqtyq» baby boıynsha jalǵan qujattar tapsyryp, memlekettiń 142 374 598 teńgesin jymqyrǵany aıtyldy.
Sot úkimi zańdy kúshine engen joq.
