Memleket qarjysyna túsirilgen fılmderdi festıvalderge qatystyrý mindeti qoıylmaq
ASTANA. KAZINFORM — Bıyl ekranǵa 6 kınojoba sonyń ishinde anımatsııalyq jáne derekti fılm jaryqqa shyǵady. Al 2026 jyly 12 joba josparlanyp otyr. Otandyq fılmder týraly tolyǵyraq Mádenıet jáne aqparat mınıstrligi mádenıet komıteti kınematografııa basqarmasynyń jetekshisi Ǵanı Muratov aıtyp berdi.
— Mınıstrlik Ulttyq kıno ortalaǵymen birlesip memlekettik qarjylandyrý alǵan fılmderge prokatqa jáne festıvalderge qatysý mindetin qoıa otyryp únemi monıtorıng júrgizedi. Búginde prokatqa arnalǵan 54 kórkem fılmniń 34-i ekranǵa shyqty. Ótken jyly 5 ulttyq fılm keń prokatqa shyǵyp, jyl sońyna deıin taǵy 10 fılm (onyń ishinde «Kapıtan Baıtasov», «Kúzgi samal», «Qaıtadan», anımatsııalyq «Altyn adam» jáne t. b.) kórermenge jol tartady, — dedi Ǵanı Muratov elordada otandyq fılmder taqyrybyna arnalǵan baspasóz máslıhatynda.
Mınıstrlik ókili keltirgen málimetke súıensek, bıyl 6 kınojoba sonyń ishinde anımatsııalyq jáne derekti fılm jaryqqa shyǵady. Al 2026 jyly 12 joba josparlanyp otyr.
— Bıylǵa arnalǵan jańa konkýrs jarııalandy. Memlekettik qoldaý birinshi kezekte kommertsııalyq tabysqa emes, fılmderdiń sapasy men áleýmettik-aǵartýshylyq mıssııasyna baǵyttalǵan. Ásirese jas rejısserlerdiń (qysqametrajdy fılmderge deıin), avtorlyq jáne derekti týyndylaryna, sondaı-aq anımatsııany qoldaýǵa basymdyq beriledi, — deıdi ol.
Aıta keteıik, endi jeke qarajatqa túsirilgen fılmder de prokat aldynda saraptamadan ótedi.
Buǵan deıin endi elimizde prokatqa shyǵatyn fılmder qatań baqylanatyny týraly jazǵan edik.
Sondaı-aq Qazaqstanda kınoǵa prokat quqyǵyn berýmen aınalysatyn saraptamalyq komıssııa qurylýy múmkin.